کراچی: پاکستانی نوجوانوں کو جرمنی میں مختلف شعبہ جات کی تربیت دینے کی مفاہمتی یادداشت پر دستخط کر دیے گئے۔
تفصیلات کے مطابق پاکستان اور جرمنی کے اسٹارٹ اپس کا ایکو سسٹم مرتب کرنے کے لیے کراچی کی این ای ڈی یونیورسٹی میں ایک اہم معاہدہ ہوا ہے۔
یہ معاہدہ جرمن اماراتی کونسل فار انڈسٹری اینڈ کامرس اور نیشنل انکیوبیشن سینٹر کے اسٹارٹ اپ ’ایل ایم کے ٹی‘ کے درمیان ہوا ہے۔
اس موقع پر جرمن قونصل جنرل نے کہا کہ پاکستانی ٹیکسٹائل کی صنعت جرمنی کی ضروریات کو پورا کرنے میں اہم کردار ادا کرتی ہے، لیکن پاکستان کی صلاحیت کو دیکھتے ہوئے جرمنی کے ساتھ کئی دیگر شعبوں میں تعاون بڑھانے کی اشد ضرورت ہے۔
سی ای او جرمن اماراتی جوائنٹ کونسل برائے صنعت و تجارت نے کہا کہ اس معاہدے سے پاکستان میں کاروباری سرگرمیوں کو فروغ ملے گا اور پاکستان کے نئے کاروباری نوجوانوں کو جرمنی میں کاروبار کرنے کے مواقع میسر آئیں گے۔
