بیجنگ: چین نے تائیوان کو ریڈ لائن قرار دے دیا ہے۔
چینی میڈیا کے مطابق چین اور امریکا کے درمیان کشیدگی برقرار ہے، چین نے تائیوان امریکا تعلقات کی کھل کر مخالفت کر دی۔
چینی وزیرِ خارجہ چن کینگ نے واضح کر دیا کہ امریکا نے اپنی روش نہ بدلی تو تصادم ہو سکتا ہے، پارلیمنٹ کے سالانہ اجلاس سے خطاب کرتے ہوئے چن کینگ نے کہا کہ کشیدگی کی وجہ امریکا کی متنازعہ پالیسیاں ہیں۔
انھوں نے کہا کہ امریکا بحرِ ہند میں مخصوص گروپ بنانے میں مصروف ہے، گروپ بندیوں سے خطے کے مفادات کو نقصان پہنچے گا، امریکا حد میں رہے۔
چینی وزیر خارجہ نے یوکرین جنگ پر بھی تبصرہ کرتے ہوئے کہا کہ کچھ خفیہ ہاتھ یوکرین جنگ کو بڑھانا چاہتے ہیں۔
دی وال اسٹریٹ جرنل کا کہنا ہے کہ بیجنگ کی اعلیٰ قیادت کی طرف سے امریکا پر سخت نئے زبانی حملے اس بات کو ظاہر کرتے ہیں کہ دنیا کی دو بڑی طاقتوں کے درمیان تعلقات کس قدر غیر مستحکم ہو چکے ہیں۔
روئٹرز نے لکھا کہ چین کے وزیر خارجہ نے منگل کو یوکرین میں جنگ اور روس کے ساتھ اپنے قریبی تعلقات سے معلق اپنے مؤقف کا دفاع کرتے ہوئے کہا کہ امریکا کو چین کے بارے میں اپنا ’بگڑا‘ رویہ تبدیل کرنا چاہیے ورنہ ’تنازعہ اور تصادم‘ ہوگا۔
