لاہور : وزیرداخلہ رانا ثناءاللہ نے چیئرمین پی ٹی آئی عمران خان کو بزدل قرار دیتے ہوئے کہا کہ لگتا ہے عمران خان جیسے ہی جیل جائیں گے اٹیک سے مرجائیں گے، انہوں نے کہا کہ پیشی کے موقع پر ان کے ساتھ سو سے زیادہ لوگ مسلح تھے۔
لاہور میں نیوز کانفرنس سے خطاب کرتے ہوئے راناثناء اللہ نے عمران خان پر شدید تنقید کی اور کہا کہ عمران خان ایک بزدل انسان ہیں انہیں گرفتاری کا انہیں خوف ہے، لگتا ہے عمران خان جیسے ہی جیل جائیں گے اٹیک سے مرجائیں گے۔
انہوں نے کہا کہ عدالت میں پیشی کے موقع پر عمران خان کے ساتھ جو لوگ تھے ان میں سو سے زیادہ لوگ مسلح تھے، انہوں نے چیئرمین پی ٹی آئی کو بزدل قرار دیتے ہوئے کہا کہ عمران خان آج صبح300،400لوگوں کےجتھے کے ساتھ عدالت پہنچے۔
جب پولیس نے انہیں کہا کہ انہیں اور گاڑی میں موجود دیگر لوگوں کو اندر جانے کی اجازت ہے تو عمران خان نے کہا نہیں میرے ساتھ موجود سارے لوگ عدالت جائیں گے اور پھر لوگوں کی بڑی تعداد نےعدالت میں گھسنے کی کوشش کی تو پولیس نےبھی سختی کی۔
وزیر داخلہ کا کہنا تھا کہ عدالت میں پیش ہونے سے ایک دن پہلے عمران خان کو ضمانتیں دی گئیں، سیکیورٹی کی یقین دہانی کے باوجود عمران خان جتھے کی شکل میں عدالت آئے، عدالتی حکم کی تعمیل کیلئے جانے والوں کے سرپھاڑے جارہے ہیں، جیل جانے کے ڈرسے عمران خان نے ملک کو داؤ پر لگایا ہوا ہے، عمران خان جیل سے بچنے کیلئے لوگوں کو مروانے پر تلےہوئے ہیں۔
