اسلام آباد : عوامی مسلم لیگ کے سربراہ شیخ رشید احمد نے وفاقی وزیر داخلہ پر شدید تنقید کرتے ہوئے رانا ثناء اللہ کو اجرتی قاتل قرار دیا ہے ان کا کہنا ہے کہ اس کا انجام برا ہوگا۔
اسلام آباد ہائی کورٹ کے باہر میڈیا سے گفتگو کرتے ہوئے انہوں نے کہا کہ رانا ثنا اللہ کا دماغ خراب ہوگیا ہے اس کا انجام برا ہوگا، وہ جس طرح للکار رہا ہے پیشہ ور بدمعاش اور اجرتی قاتل ہے، جو اس نے منہاج القرآن میں کیا وہ اپنے انجام کو پہنچے ہوگا۔
ایک سوال کے جواب میں انہوں نے کہا کہ خان صاحب کے خلاف سینکڑوں کیسز بنے ہوئے ہیں اور میرے خلاف بھی مقدمات ہیں، عمران خان اور میں اپنے کیسز کا دفاع کررہے ہیں۔ اس ملک میں بدمعاشی غنڈہ گردی فسطائیت ہورہی ہے۔
شیخ رشید کا کہنا تھا کہ میٹنگ میں انہیں بتادیا گیا ہے کہ عمران خان71فیصد ووٹوں سے جیت رہا ہے، رپورٹ دی گئی کہ پہلے وہ65فیصد سے جیت رہاتھااب71فیصد سےجیت رہا ہے،
اس موقع پر شیخ رشید نے اسلام آباد ہائی کورٹ کے باہر تعینات ایف سی اہلکاروں سے مصافحہ کیا اور کہا کہ یہ نوجوان پٹھان بھی ہمارے ساتھ ہیں۔
شیخ رشید کا مزید کہنا تھا کہ ہم لڑائی نہیں چاہتے صرف الیکشن چاہتے ہیں، 13جماعتوں کے لٹیرے ریاست پر قبضہ کرنے والے ہیں، اس حکومت کو کوئی بھی ملک سپورٹ نہیں کر رہا، یہ الیکشن سے بھاگ رہے ہیں، ہم نے ان کو ہرا دیا ہے۔
