کراچی : کلفٹن سی ویو برگر چین پر فائرنگ سے منیجر کے زخمی ہونے کے واقعے کے بعد ملوث ملزم تاحال پولیس کی گرفت مین نہ آسکا۔
فائرنگ کرنے والا مرکزی ملزم گرفتاری کے ڈر سے فرار ہوگیا، اس حوالے سے ایس ایس پی انویسٹی گیشن زاہدہ پروین نے میڈیا کو بتایا کہ ایئرپورٹ اتھارٹیز سے بھی رابطہ کیا گیا ہے۔
انہوں نے بتایا کہ ملزم اگر جہاز سے فرار ہونے کی کوشش کرتا تو پکڑا جاتا، ملزم شاہ زین مری اس وقت سندھ میں موجود نہیں ہے، ایس ایس پی انویسٹی گیشن کا کہنا ہے کہ ٹیکنیکل طریقے سے ملزم کو ٹریس کرنے کی کوشش کی جارہی ہے۔
خاتون پولیس افسر کے مطابق ملزم کے گرفتاری کے لئے متعدد مقامات پرچھاپے مارے گئے ہیں ملزم شاہ زین مری کے سیکیورٹی گارڈ کو حراست میں لیا تھا، جس سے تفتیش کی جارہی ہے۔
ریسٹورنٹ میں نامعلوم شخص کی اندھا دھند فائرنگ سے منیجر زخمی
یاد رہے کہ رواں ماہ 9اپریل کو کراچی کے پوش علاقے سی ویو میں قائم برگر چین میں نامعلوم شخص نے فائرنگ کرکے منیجر کو زخمی کردیا تھا،ملزم واردات کے بعد باآسانی فرار ہونے میں کامیاب ہوگیا تھا۔
برگر چین منیجر کے پیر پر گولی لگی، جسے فوری طور پر اسپتال منتقل کیا گیا۔ پولیس حکام کے مطابق نشے میں دھت ایک شخص آیا اور بدتمیزی کرنے لگا اور فائرنگ کرکے موقع سے فرار ہوگیا۔
