اسلام آباد : پاکستان عوامی لیگ کے سربراہ شیخ رشید احمد نے پیپلزپارٹی کے شریک چیئرمین آصف زرداری کی جانب سے عمران خان کو مقبول لیڈر نہ ماننے کے بیان پر انہیں شدید تنقید کا نشانہ بناتے ہوئے کہا ہے کہ آپ تو مقبول بیکری بھی نہیں ہیں۔
یہ بات انہوں نے اسلام آباد کی ضلعی کچہری میں پیشی کے موقع پر میڈیا سے بات چیت کرتے ہوئے کہی انہوں نے آصف زرداری کو مخاطب کرتے ہوئے کہا کہ تو پھر آپ کو خوف کس چیزکا ہے انتخابات کروائیں۔
انہوں نے کہا کہ آصف زرداری چاہتا ہے کہ وزیراعظم شہباز شریف نااہل ہو جائے تاکہ بلاول زرداری کا راستہ کلیئر ہو، یہ لوگ ایک سال سے کشکول لے کر پھررہے ہیں۔
وفاقی حکومت اور سپریم کورٹ کے درمیان حالیہ صورتحال پر شیخ رشید نے تبصرہ کرتے ہوئے کہا کہ عدلیہ دانش مندی سے کام کررہی ہے وہ جیتے گی، یہ لوگ صرف اپنے کیسز ختم کروانے پاکستان آئے ہیں۔
ان کا کہنا تھا کہ نیب قوانین میں ترمیم بھی ابھی ان کے گلے میں اٹکی ہوئی ہے، پوری قوم عدلیہ کے پیچھے کھڑی ہے اور انہیں جمہوریت کا ضامن سمجھتی ہے، عدلیہ پرجال پھینکنے کی کوشش کی گئی تو قوم سڑکوں پر ہو گی۔
ایک سوال کے جواب میں شیخ رشید نے کہا کہ اس وقت پاکستان آئین اور قانون کی جنگ لڑرہا ہے، اس میں صرف عدلیہ ہی جیتے گی، آرمی چیف نے کہا ہے کہ پاکستان عوام کا ہے، ہم مقدمات سے ہم گھبرانے والے نہیں۔
