شادیوں میں اکثر جہیز یا دیگر مسائل پر جھگڑے کی کہانیاں آپ نے سنی ہوگی لیکن مٹھائی پر لڑائی کا واقعہ سن کر آپ یقینی طور پر محظوظ ہونگے۔
بھارتی میڈیا رپورٹ کے مطابق واقعہ بھارتی ریاست مہاراشٹر کے علاقے پونے میں پیش آیا جہاں کیٹررز اور شادی میں آئے مہمانوں کے درمیان گلاب جامن پر لڑائی ہوئی جس کے نتیجے میں ایک شخص شدید زخمی بھی ہوا جو اب اسپتال میں زیر علاج ہے۔
رپورٹ کے مطابق واقعہ تئیس اپریل کو پیش آیا تھا۔
پولیس نے واقعے سے متعلق میڈیا کو بتایا کہ اتوار کو لوکھنڈے اور کامبلے خاندان کی شادی کی تقریب تھی، ہال کو سنجے لوکھنڈے نے بک کیا تھا،شادی کی تقریب دوپہر ڈیڑھ بجے شروع ہوئی، جس میں مہمانوں کو کھانا پیش کیا گیا۔
طعام کے بعد کئی رشتہ دار آہستہ آہستہ کھانا کھا کر اپنے گھروں کو لوٹ گئے تھے، اسی دوران ایک رشتہ دار یہ دیکھنے پہنچا کہ کتنا کھانا بچا ہے؟ اس نے باقی مہمانوں سے کہا کہ رشتے دار، کیٹررز کا بچا ہوا کھانا پیک کر کے گھر لے جائیں، بس پھر کیا تھا کچھ رشتہ داروں نے گلاب جامن ڈبوں میں بھرنا شروع کر دیا۔
یہ منظر دیکھ کر کیٹرز نے باراتیوں کو مخاطب کیا کہ یہ گلاب جامن آپ کے لیے نہیں ہے، دوسری شادی کے لیے بنائے گئے ہیں اس بات پر جھگڑا شروع ہوا اور آہستہ آہستہ بات لڑائی تک پہنچ گئی، رشتہ داروں نے مل کر منیجر دیپانشو گپتا کی پٹائی کی جس میں وہ شدید زخمی ہو گیا۔
پولیس نے واقعے کا مقدمہ درج کرتے ہوئے سی سی ٹی وی فوٹیج کی مدد سے ملزمان کی تلاش شروع کردی ہے۔
