اسلام آباد : ملک کے موسم میں غیر متوقع تبدیلیوں کے باعث مئی میں کالام میں برفباری کا 30 سالہ ریکارڈ ٹوٹ گیا۔
تفصیلات کے مطابق وفاقی وزیر موسمیاتی تبدیلی شیری رحمان نے سماجی رابطے کی ویب سائٹ مئی میں کالام میں برفباری سے 30سال کا ریکارڈ ٹوٹ گیا، کچھ علاقوں میں ہیٹ ویو اور دیگر میں غیر موسمی برفباری ہوئی۔
موسمی تبدیلیوں میں ایسی کوئی پیشگوئی باقی نہیں رہی جس کاعندیہ نہ دیا گیا، موسمیاتی تناؤ پہلے سے ہی کمزور معیشتوں کو مزید مشکلات میں لاتا ہے۔
May snowfall in Kalam, Pakistan breaks 30 years’ record.Heatwave in some areas on way and unseasonal snow in others.There is no predictability left in the seasonal patterns as we knew them. Climate stress brings home distress to already fragile economies. https://t.co/UhBiVOcaTM
— SenatorSherryRehman (@sherryrehman) May 8, 2023
خیال رہے پاکستان کے موسم میں غیر متوقع تبدیلی کے باعث ضلع سوات میں برف باری، ژالہ باری اور شدید بارشوں سے نہ صرف مئی کے مہینے میں سردیاں واپس آئی بلکہ کالام کے پہاڑی تفریحی مقام میں برفباری کا 30 سالہ ریکارڈ بھی توڑ دیا۔
کالام میں 17 ملی میٹر بارش ہوئی جبکہ علاقے کے بالائی علاقوں میں برفباری ہوئی جو کہ موسم کا ریکارڈ ہے، مئی میں برف باری 30 سال بعد ہوئی ہے۔
گزشتہ 24 گھنٹوں کے دوران کشمیر کے راولاکوٹ میں سب سے زیادہ (27 ملی میٹر) بارش، کالام میں 17 ملی میٹر، مالم جبہ میں 22 ملی میٹر، حافظ آباد میں 19 ملی میٹر، جوہرآباد میں 15 ملی میٹر اور چکوال اور منگلا میں 12 ملی میٹر ریکارڈ کی گئی۔
دوسری جانب شہید بینظیر آباد، لاڑکانہ، موہنجو داڑو اور پڈعیدن میں زیادہ سے زیادہ درجہ حرارت 42 ڈگری سینٹی گریڈ ریکارڈ کیا گیا۔ ماہرین موسمیات کے مطابق ملک کے بیشتر میدانی علاقوں میں موسم خشک رہے گا۔
تاہم بالائی خیبرپختونخوا، خطہ پوٹھوہار، اسلام آباد، کشمیر اور گلگت بلتستان میں تیز ہواؤں اور گرج چمک کے ساتھ مزید بارش ہوگی جب کہ بعض مقامات پر ژالہ باری کا بھی امکان ہے۔
