پشاور: خیبر پختونخوا میں جلاؤ گھیراؤ، توڑ پھوڑ سے نقصانات کی تفصیلی رپورٹ سامنے آگئی۔
تفصیلات کے مطابق پاکستان تحریک انصاف کے چیئرمین عمران خان کی گرفتاری کے بعد ملک کے کئی شہروں میں احتجاج جاری ہے اس دوان مشتعل مظاہرین نے سرکاری اور نجی املاک کو نقصان پہنچایا۔
رپورٹ کے مطابق خیبر پختونخوا میں مشتعل مظاہرین نے ریڈیو پاکستان کی عمارت کو جلایا، صوبائی الیکشن کمیشن کے دفتر میں توڑ پھوڑ کی اس دوران پشاور میں مظاہرے کرنے والے 50 افراد اور صوابی سے 40 مشتعل افراد کو گرفتار کیا گیا۔
رپورٹ میں بتایا گیا کہ پشاور میں ایمبولینس سمیت 10 گاڑیاں جلائی گئیں، انسداد منشیات کی گاڑیوں اور ابابیل اسکواڈ کی 2 موٹر سائیکل کو بھی نقصان پہنچایا گیا۔
رپورٹ میں بتایا گیا کہ چکدره اور تیمرگرہ میں ایف سی قلعوں پر مشتعل افراد نے دھاوا بولا، اس دوران مظاہرین لیپ ٹاپ، پنکھے، میز کرسیاں اور اسلحہ لوٹ کر لے گئے۔
پشاور سے اسلام آباد، چارسدہ سے اسلام آباد ٹول پلازہ بھی جلائی گئی، کوہاٹ یونیوسٹی پر حملہ، گیٹ توڑ کر جامعہ کی تزئین و آرائش کو نقصان پہنچایا گیا مظاہرین نے درجنوں چیک پوسٹ پر لگے سی سی ٹی وی کیمرے بھی توڑ دالیں۔
رپورٹ میں مزید بتایا گیا کہ پشاور کے تھانہ شرقی میں 4 مقدمات درج کئے گئے، مقدموں میں انسداد دہشت گردی کی دفعات بھی شامل ہیں۔
