اسلام آباد : وزیر اعظم شہباز شریف کی ایرانی صدر ابراہیم رئیسی سے رواں ماہ اہم ملاقات کا امکان ہے، دونوں رہنماوں کی ملاقات پشین کی سرحدی گزرگاہ کے قریب ہونے کی توقع ہے۔
تفصیلات کے مطابق پاک ایران دو طرفہ تعلقات میں ایک اہم پیشرفت ہوئی، ذرائع نے بتایا کہ وزیر اعظم شہباز شریف کی ایرانی صدر ابراہیم رئیسی سےرواں ماہ اہم ملاقات کاامکان ہے۔
وزیراعظم اور ایرانی صدر کی ملاقات بلوچستان کے علاقے پشین میں متوقع ہے، ملاقات کیلئے وزیر اعظم کا خصوصی طور پر 18 مئی کو بلوچستان کے دورے کا امکان ہے۔
ایرانی صدر اور وزیر اعظم کی ملاقات پشین کی سرحدی گزرگاہ کے قریب ہونے کی توقع ہے ، جہاں ایرانی صدر اور وزیر اعظم مشترکہ طور پر ایران سے 100میگا واٹ بجلی درآمد کاافتتاح کریں گے۔
ذرائع نے بتایا کہ پاکستان ایران سے فی الوقت 200 میگا واٹ بجلی درآمد کر رہا ہے، پاکستان کی ایران سے بجلی درآمد کو 500میگا واٹ تک بڑھانے گنجائش ہے، پاکستان 2002سے مکران ڈویژن کے لیے ایران سے بجلی درآمد کر رہا ہے۔
ذرائع کے مطابق ایرانی صدر اور وزیراعظم کے پاک ایران سرحدی منڈی کے باضابطہ افتتاح کا بھی امکان ہے، اپران اور پاکستان کی سرحد پر تین نئی تجارتی منڈیاں بھی کھولی جا رہی ہیں۔
ذرائع کا کہنا تھا کہ مند کے مقام پر پاک ایران تجارتی منڈی کو کھولا جا چکا ہے جبکہ پاک ایران سرحد پردیگر دومنڈیوں کو کھولنے کے حوالے سے کام جاری ہے۔
