مسلم لیگ ن کی نائب صدر مریم نواز نے الزام عائد کیا ہے کہ 9 مئی کو عمران خان کی منصوبہ بندی پر اس کے غنڈوں اور مسلح جتھوں نے دہشتگردی کی۔
اے آر وائی نیوز کے مطابق حکومتی اتحادی جماعت پی ڈی ایم کی جانب سے گزشتہ روز دفعہ 144 کے نفاذ کے باوجود اسلام آباد میں شاہراہ دستور پر سپریم کورٹ کے خلاف احتجاج اور دھرنا دیا گیا۔ مسلم لیگ ن کی نائب صدر مریم نواز نے گزشتہ روز شاہراہ دستور پر سپریم کورٹ کے خلاف احتجاج میں آنے والے کارکنوں کو خراج تحسین پیش کیا ہے۔ اس کے ساتھ ہی انہوں نے پی ڈی ایم میں شامل تمام جماعتوں کے قائدین اور سیاسی کارکنوں کا بھی شکریہ ادا کیا ہے۔
مریم نواز نے خاص طور پر مسلم لیگ (ن) کے قائدین اور کارکنوں کو خراج تحسین پیش کرتے ہوئے کہا کہ شاہراہ دستور پر ہزاروں مظاہرین نے جمہوری احتجاج کی روشن مثال قائم کی اور ہزاروں کی تعداد میں مرد، خواتین اور نوجوانوں نے بتایا پُر امن احتجاج کیا ہوتا ہے۔ ایک شاخ یا گملا نہیں ٹوٹا اور نہ ہی کوئی عمارت جلی، گاڑی یا ایمبولینس روکی گئی اور نہ ہی کسی پولیس اہلکار کا سر پھٹا۔
ان کا کہنا تھا کہ 9 مئی کے یوم سیاہ اور15 مئی کے عوامی احتجاج میں فرق پوری دنیا نے دیکھ لیا۔ 9 مئی کو دہشتگردی کیسے ہوتی ہے اور ایک دن کی کال پر عوام خود کیسے باہر آتی ہے، فرق سامنے آ گیا۔ چوری چھپانے کی خاطر پاکستان کو جلانے میں کیا فرق ہے؟ یہ بھی دنیا نے دیکھ لیا۔
مریم نواز نے مزید کہا کہ 9 مئی کو عمران خان کی منصوبہ بندی پر اس کے غنڈوں اور مسلح جتھوں نے دہشتگردی کی۔ اسکول، مساجد، سرکاری املاک جلائیں گئیں، شہدا کی یادگاروں کی بے حرمتی کی گئی اس کے برعکس 15 مئی کو شاہراہِ دستور پر احتجاج میں میڈیا کی گاڑیوں کو توڑا گیا نہ کسی صحافی پر تشدد ہوا۔ 9 مئی وطن دشمنی اور 15 مئی حب الوطنی کی دو مثالیں، دو موازنے اور دو رویے ہیں
ان کا کہنا تھا کہ عارف علوی کے خلاف اشتعال کے باوجود کسی کارکن نے ایوان صدر کا رخ نہیں کیا۔ عوام جانتے ہیں یہ حلف کی خلاف ورزی کرنے والے شخص کا گھر نہیں بلکہ ایوان صدر ہے۔
