بھارتی ریاست تلنگانہ میں کار ڈرائیور کی لاپرواہی نے معصوم بچی کی جان لے لی۔
بھارتی میڈیا رپورٹ کے مطابق ریاست تلنگانہ کے گاؤں بوجاگوڈیم میں اندراجا نامی نو سالہ لڑکی اپنے رشتے داروں کے ہاں شادی کی تقریب میں آئی تھی۔
شادی کی تقریب کے دوران کچھ لوگ خوشی سے ڈانس کررہے تھے کہ اسی دوران اندراجا دلہن کی کار کی پچھلی نشست پر بیٹھی اور کھڑکی سے گردن باہر نکال کر ڈانس دیکھنے لگی۔
اسی دوران کار ڈرائیور نے لڑکی کو دیکھے بغیر کھڑکی کے شیشوں کا بٹن دبایا جس کے نتیجے میں نوسالہ بچی کی گردن پھنس گئی، بچی بُری طرح چلائی مگر ڈانس کے شور میں کسی نے معصوم کی آواز نہ سنی اور وہ اسی حالت میں اس کی موت واقع ہوگئی۔
شادی کا ہلہ گلہ تھما تو بچی کی لاش کو نکال کر اسپتال منتقل کیا جہاں ڈاکٹرز نے اس کی موت کی تصدیق کردی۔
مقامی پولیس کے مطابق لڑکی کے باپ کی شکایت پر ڈرائیور شیکھر کے خلاف مقدمہ درج کرتے ہوئے اسے گرفتار کرلیا گیا ہے اور مزید کارروائی کا آغاز کردیا گیا ہے۔
