لاہور: سابق صدر آصف علی زرداری دبئی سے لاہور پہنچ گئے۔
تفصیلات کے مطابق پاکستان پیپلز پارٹی کے شریک چیئرمین آصف علی زرداری خصوصی طیارے سے لاہور پہنچ گئے، ذرائع کا کہنا ہے کہ زرداری آج لاہور میں مصروف دن گزاریں گے۔
ذرائع کے مطابق آصف زرداری پی ٹی آئی رہنماؤں کی پی پی میں شمولیت کے موقع پر پریس کانفرنس کریں گے، جو رات 8 بجے بلاول ہاؤس میں ہوگی، پریس کانفرنس میں یوسف رضا گیلانی، مخدوم احمد محمود حسن مرتضیٰ، رانا فاروق بھی شریک ہوں گے۔
آصٖف زرداری پیپلز پارٹی پنجاب کی قیادت سے ملاقات کریں گے، جس میں 9 مئی کے واقعات کے بعد کی صورت حال کے تناظر میں سیاسی صورت حال پر تبادلہ خیال کیا جائے گا، زرداری آئندہ انتخابات کے حوالے سے بھی مشاورت کریں گے۔
ذرائع کے مطابق آصف زرداری کی چوہدری شجاعت حسین اور دیگر رہنماؤں سے بھی ملاقات کا امکان ہے، ان کا لاہور میں قیام 3 دن تک ہوگا۔
