اسلام آباد : وزیرتوانائی خرم دستگیر خان نے آئندہ سال سے پورے ملک میں بجلی کی قیمت کو یکساں رکھنے کا اعلان کرتے ہوئے کہا کراچی کے بجلی صارفین کو 315 ارب روپے کا ریلیف ملے گا۔
تفصیلات کے مطابق وزیر توانائی خرم دستگیر نے پریس کانفرنس کرتے ہوئے کہا کہ آئندہ سال ملک بھر میں بجلی پر پانچ سو اناسی ارب روپے سبسڈی دیں گے، کراچی کے بجلی صارفین کیلئے 315 ارب روپے کی سبسڈی رکھی ہے اور 171 ارب روپے کی سبسڈی بجلی کی قیمت یکساں رکھنے کیلئے الگ دی جائے گی۔
وزیر توانائی کا کہنا تھا کہ ملک بھر کے بجلی صارفین کے بلوں کی مدمیں 870 ارب روپے وفاق ادا کرےگا، ہمیں رواں مالی سال میں 3 ہزار800میگاواٹ بجلی سسٹم میں شامل کرنی ہے، جس کے بعد کراچی کے بجلی صارفین کو171ارب روپے کا ریلیف دیا جائے گا۔
خرم دستگیر نے بتایا کہ تھرمنصوبےسے1980میگاواٹ بجلی سسٹم شامل ہوئی ہے، توانائی سیکٹر میں جوترقی کاسفر مفلوج ہوا تھا وہ دوبارہ شروع کردیا، سی پیک منصوبے جو روک دیئےگئے تھے انھیں دوبارہ شروع کردیاگیا ہے، 2018سے جو روشنی بجھادی گئی تھی وہ دوبارہ لے آئے ہیں۔
ان کا کہنا تھا کہ پاکستان سے گیس کی پیداوار ہر سال کم ہورہی ہے ،پاکستان میں گیس کے ذخائر محدود ہیں۔
وزیر توانائی نے بتایا کہ فاٹا کےضم شدہ اضلاع کیلئےبجلی کی مد میں25ارب روپےریلیف فراہم کیاجائے گا، آزاد کشمیر کو بجلی کی مدمیں 55ارب روپے ریلیف دیا جارہا ہے، پچھلے سال کے بقایاجات کیساتھ80ارب روپے آزادکشمیر کیلئےمختص کیا گیا ہے۔
