کراچی: شہر قائد میں اپنی دو معصوم بچیوں کو بھوکا رکھنے اور بدترین تشدد کا نشانہ بنانے والی شقی القلب ماں کو پولیس نے باقاعدہ طور پر گرفتار کر لیا۔
تفصیلات کے مطابق کراچی کے علاقے ملیر آسو گوٹھ شعبان ٹاؤن سے 2 بچیوں کائنات اور خوشی کی بازیابی کے معاملے میں پولیس نے ان کی والدہ کو باقاعدہ طور پر گرفتار کر لیا ہے۔
پولیس نے ملیر سٹی تھانے میں بچیوں کے والدین کے خلاف مقدمہ درج کر لیا، مقدمہ جان سے مارنے کی کوشش اور دیگر دفعات کے تحت درج کیا گیا ہے۔
پولیس حکام کے مطابق بچیوں کے جسم پر مختلف جگہ جلائے جانے کے نشانات ہیں، بازیاب ہونے والی بچیاں کافی عرصے سے بھوکی تھیں، سوتیلی ماں اور والد کی جانب سے بچیوں پر تشدد کیا جاتا تھا ۔
رپورٹ کے مطابق بچیاں جب کھانا مانگتی تھیں تو ان کو جلایا جاتا تھا، بچیوں کو چھت پر باندھ کر بھوکا رکھا جاتا تھا، تشدد کرتے وقت ٹیپ کو اونچی آواز میں چلا دیا جاتا۔
یاد رہے کہ پڑوسیوں نے بچیوں کے گھر میں گھس کر بچیوں کو نکالا تھا، یہ دونوں بچیاں اس وقت جناح اسپتال میں زیر علاج ہیں، پولیس حکام کا کہنا ہے کہ اس کیس کو ایس ایچ او وومن تھانہ خود دیکھ رہی ہیں۔
