کراچی: لٹیروں نے ایک اور نوجوان کی زندگی کا دیا بجھا دیا، لانڈھی مظفر آباد کالونی میں ڈکیتی مزاحمت پر نوجوان کو قتل کر دیا گیا۔
تفصیلات کے مطابق کراچی کے علاقے لانڈھی مظفر آباد کالونی میں ڈاکوؤں کی فائرنگ سے ایک نوجوان جاں بحق ہو گیا، علاقہ مکینوں نے واقعے پر شدید احتجاج کیا، واقعے کی سی سی ٹی وی فوٹیج اے آر وائی نیوز نے حاصل کر لی۔
مقتول کی شناخت 26 سالہ احسان اللہ کے نام سے ہوئی ہے، مقتول کے لواحقین اور علاقہ مکینوں نے اسپتال چورنگی پر دھرنا دے کر احتجاج کیا۔
فائرنگ کے واقعے کی سی سی ٹی وی فوٹیج میں دیکھا جا سکتا ہے کہ گلی میں گھر کی دہلیز پر دو افراد بیٹھے ہوئے تھے، اور ایک شخص وہاں سے گزر رہا تھا، کہ ایسے میں موٹر سائیکل پر سوار 2 مسلح لٹیرے پہنچ گئے۔
خواتین سے ڈھائی لاکھ نقدی اور زیورات کی ڈکیتی، پولیس نے سی سی ٹی وی فوٹیج غائب کر دی
لٹیروں کو دیکھتے ہی راہ گیر تو گلی میں بھاگ گیا، جب کہ گلی میں بیٹھا ہوا احسان نامی نوجوان بھی اٹھ کر اچانک گلی طرف بھاگ کھڑا ہوا، تاہم قاتل لٹیرے نے اس پر گولی داغ دی۔
احسان کو گلی میں گر کر اور پھر اٹھ کر بھاگتے دیکھا جا سکتا ہے، لٹیروں نے گلی میں موجود شخص سے لوٹ مار کی اور پھر بھاگ گئے۔
