اسلام آباد : قومی اسمبلی 8 اگست کو تحلیل کر دی جائے گی، آئینی ماہرین کا کہنا ہے کہ صدر مملکت نےدستخط نہ کیے تو 48 گھنٹے میں اسمبلی خود بخود تحلیل ہو جائے گی۔
تفصیلات کے مطابق قومی اسمبلی اپنی آئینی مدت سے چار روز قبل تحلیل کردی جائے گی، ذرائع کا کہنا ہے کہ قومی اسمبلی 8اگست کو تحلیل کر دی جائے گی، قومی اسمبلی کی تحلیل کی سمری صدر مملکت کو ارسال کی جائے گی۔
آئینی ماہرین کا کہنا ہے کہ صدر مملکت نےدستخط نہ کیے تو 48 گھنٹے میں اسمبلی خود بخود تحلیل ہوجائےگی۔
خیال رہے حکومت کی مدت 12 اگست رات بارہ بجے تک پوری ہوگی، آئینی و قانونی ماہرین کے مطابق قبل از وقت اسمبلی کی تحلیل سے نوے دن میں الیکشن کرانا ہوگا، اگر اسمبلی اپنی آئینی مدت پوری کریں تو ساٹھ دن میں انتخابات کرانا ہوتا ہے۔
اس حوالے سے وفاقی وزیر قانون اعظم نذیر تارڑ کا کہنا تھا کہ 13 اگست تک قومی اسمبلی تحلیل ہو جائے گی تاہم سیاسی صورتحال پر قبل ازوقت اسمبلی تحلیل ہوتی ہے تو کچھ کہا نہیں جا سکتا۔
وزیراعظم شہباز شریف نے بھی کہا تھا کہ موجودہ حکومت کی مدت چودہ اگست کوختم ہوجائےگی، الیکشن کمیشن انتخابات کی تاریخ دے گا۔
