اسلام آباد: ذرائع وزارت خزانہ کا کہنا ہے کہ آئی ایم ایف سے بجلی بلوں میں ریلیف کے پلان پر اتفاق نہیں ہوسکا ہے۔
اے آر وائی نیوز کے مطابق پلان میں بتایا گیا تھا بلوں میں ریلیف سے ریکوری میں ساڑھے 6 ارب سے کم کا اثر پڑے گا، آئی ایم ایف نے پلان مسترد کرتے ہوئے کہا کہ 15 ارب سے زائد کا اثر پڑے گا۔
ذرائع کا بتانا ہے کہ آئی ایم ایف نے 15 ارب کی مالیاتی گنجائش پوری کرنے کا پلان بھی پوچھا ہے۔
آئی ایم ایف کے ساتھ دوبارہ پلان شیئر کیا جانا ہے جس کے باعث تاخیر ہورہی ہے، نیا پلان شیئر ہونے پر آئی ایم ایف حکام اور وزارت خزانہ دوبارہ بات کریں گے۔
وزارت خزانہ ذرائع کا کہنا ہے کہ بلوں میں ریلیف دینے کے لیے بجٹ سے آؤٹ نہ ہونے کی آئی ایم ایف کو یقین دہانی کروائی گئی ہے۔
بلوں کو چار ماہ میں وصول کرنے کے لیے آئی ایم ایف سے درخواست کی، اقساط میں وصولی پلان کی آئی ایم ایف سے دوبارہ بات چیت ہوگی۔
