آرمی چیف جنرل عاصم منیر نے کہا ہے کہ پاک فوج کی پیشہ ورانہ مہارت و قیادت دنیا کی کسی فوج کے مقابلے میں بہترین ہے۔
آئی ایس پی آر کے مطابق کثیرالملکی اسپیشل فورسز کی مشترکہ مشق کی افتتاحی تقریب بروتھا میں منعقد ہوئی۔ 2 ہفتے پر مشتمل مشق میں پاکستان، قازقستان، قطر، ترکیہ اور ازبکستان کی اسپیشل فورسز نے شرکت کی۔
چیف آف آرمی اسٹاف جنرل سید عاصم منیر نشان امتیاز (ملٹری) نے بروتھا گیریژن کا دورہ کیا۔ اس موقع پر آرمی چیف کو جنرل آفیسر کمانڈنگ اسپیشل سروسزگروپ کی مشق سے متعلق بریفنگ دی گئی۔
آئی ایس پی آر کے مطابق مشق کا مقصد دوست ممالک کے درمیان تاریخی فوجی تعلقات کو مزید بڑھانا ہے۔ مشق کا مقصد فوجی تعاون اور تجربات سے مستفید ہو کر دہشت گردی کیخلاف نبردآزما ہونا ہے۔
چیف آف آرمی اسٹاف نے جونیئر لیڈرشپ اکیڈمی شنکیاری کا بھی دورہ کیا۔ اس موقع پر آرمی چیف نے کہا کہ جونیئر لیڈرز پاکستان آرمی کی ریڑھ کی ہڈی کی حیثیت رکھتے ہیں، جونیئر لیڈرز روایتی اور غیرروایتی جنگ میں کلیدی کردار ادا کر رہے ہیں، پاک فوج کےجونیئرلیڈرز نے دنیا بھر میں تربیت، آپریشنز میں اپنا لوہا منوایا ہے۔
شنکیاری اور بروتھا آمد پر انسپکٹر جنرل ٹریننگ اینڈ ایویلیوایشن نے آرمی چیف کااستقبال کیا۔
