قومی ٹیم کے سابق کپتان محمد حفیظ کی پی سی بی مینجمنٹ کمیٹی کے رکن کی حیثیت سے مستعفی ہونے کی وجہ سامنے آگئی۔
گزشتہ روز سابق کپتان محمد حفیظ نے کرکٹ کمیٹی کے رکن کی حیثیت سے مستعفی ہونے کا اعلان کرتے ہوئے لکھا تھا کہ ’میں نے اعزازی ممبر کی حیثیت سے اپنی خدمات انجام دیں۔
ان کا کہنا تھا کہ کرکٹ کمیٹی میں ذمہ داری دینے کے لیے ذکا اشرف کا شکریہ ادا کرتا ہوں، پاکستان کرکٹ کے لیے میری نیک خواہشات ہمیشہ رہیں گی۔
محمد حفیظ کا کہنا تھا کہ جب بھی ذکا اشرف کو جب بھی میری دیانتدرانہ تجاویز کی ضرورت ہوگی تو میں ہمیشہ دستیاب ہوں گا۔
تاہم اب محمد حفیظ کی ٹیکنیکل کمیٹی سے استعفیٰ دینے کی وجہ سامنے آگئی ہے۔
ذرائع کا بتانا ہے کہ محمد حفیظ اور مصباح الحق کی تجاویز پر غور نہیں کیا گیا، اجلاس میں ٹیکنیکل کمیٹی نے کپتان اور کوچز سے اسپنرز کی کارکردگی پر سوال اٹھایا۔
کمیٹی عماد وسیم کو اسکواڈ میں شامل کرنے کے حق میں تھی تاہم شاداب خان کا دباؤ کم کرنے کے لیے انہیں نائب کپتان سے ہٹانے کی بھی تجویز دی گئی مگر بابر اعظم شاداب کے لیے ڈٹ گئے تھے۔
