کراچی: ایف آئی اے کمرشل بینکنگ سرکل نے کار شو روم مالکان کے خلاف ٹریڈ بیس منی لانڈرنگ تحقیقات کا آغاز کردیا۔

اے آر وائی نیوز کے مطابق ایف آئی اے نے کراچی کے علاقے خالد بن ولید روڈ سے تحقیقات کا آغاز کیا ہے، ابتدائی طور پر چار شو روم مالکان نوٹسز جاری کردیے گئے ہیں۔

ذرائع کا بتانا ہے کہ کار شو روم مالکان سے بیرون ملک سے گاڑیاں منگوانے کا مکمل ریکارڈ طلب کیا گیا ہے، فوری انکوائری مجاز اتھارٹی کے احکامات پر شروع کی گئی ہے۔

ایف آئی اے ذرائع کا کہنا ہے کہ غیرقانونی ایکسچینج، ہنڈی حوالہ ڈیلرز بیرون ملک سے گاڑیوں کی خریداری میں ملوث ہیں۔

ایف آئی اے ٹیم نے چاروں شوروم مالکان کو 26 ستمبر کو طلب کیا ہے اور ان سے یکم جنوری 2021 سے آج تک کا ریکارڈ طلب کیا گیا ہے۔

ذرائع ایف آئی اے کی جانب سے سوال کیا گیا ہے کہ کار خریداری کے لیے بیرون ملک پیسے کیسے بھجوائے جاتے ہیں، گاڑیاں کیسے اور کس کے نام پر منگوائی گئیں۔

کار شو روم مالکان کو مکمل درآمدی دستاویزات اور متعلقہ کاغذات لانے کی ہدایت کی گئی ہے۔

ایف آئی اے ذرائع کا کہان ہے کہ نوٹس کی تعمیل نہ کرنے پر قانونی کارروائی کی جائے گی جبکہ ٹریڈ بیس منی لانڈرنگ کی تحقیقات کا دائرہ کار ملک بھر میں بڑھایا جائے گا اور بیرون ملک سے کار درآمد کرنے والے شوروم مالکان سے تفتیش کی جائے گی۔