کرکٹ ورلڈکپ کے لیے بھارت میں موجود قومی ٹیم کے اہم کھلاڑی کا کہنا ہے کہ یہاں کے کھانے کافی لذیذ ہیں اور لگ رہا ہے کہ ہمارا وزن بڑھنے والا ہے۔
ذرائع ابلاغ سے گفتگو کرتے ہوئے یہ بات قومی ٹیم کے نائب کپتان شاداب خان نے کہی، حیدرآباد دکن میں پریس کانفرنس کرتے ہوئے انھوں نے کہا کہ جس طرح ایئرپورٹ پر ٹیم کا استقبال کیا گیا ہے اور جتنے بھی لوگ ہوٹل کے باہر آتے ہیں تو اسے دیکھ کر خوشی ہو رہی ہے۔
شاداب کے مطابق حیدرآباد کے کھانے بہت مزیدار ہیں اور انھیں کھا کر لگ رہا ہے کہ وزن بڑھ جائے گا۔ انھوں نے کہا کہ بطور ٹیم ہمارا ایشیا کپ اچھا نہیں رہا لیکن یہ ہی کرکٹ کا حسن ہے کہ آپ ہمیشہ غلطیوں سے سیکھتے ہیں۔
آل رائونڈر نے کہا کہ یہاں کی کنڈیشنز پاکستان کی طرح ہیں اور نیوزی لینڈ کے خلاف وارم اپ میچ کی پچ راولپنڈی جیسی فلیٹ تھی۔
اپنی فارم کے حوالے سے شاداب نے کہا کہ حالیہ دنوں میں میری فارم اتنی اچھی نہیں تھی، لیکن مجھے ریسٹ ملا ہے۔ جب آپ زیادہ کرکٹ کھیل رہے ہوتے ہیں اور آپ سے پرفارمنس نہیں ہو رہی ہوتی تو آپ ذہنی طور پر ڈاؤن ہوتے ہیں۔
مجھے لگتا ہے کہ جو ذہنی تھکاوٹ تھی وہ آرام کے بعد ٹھیک ہوگئی ہے۔ ورلڈ کپ میں نئے مائنڈ سیٹ کے ساتھ کھیلیں گے۔
فخر زمان کے بارے میں شاداب نے کہا کہ پاکستانی بیٹر ایسے پلیئر ہیں جن کا دوسری ٹیم پر دباؤو ہوتا ہے۔ انھوں نے اس سال تین سینچریاں بنائی ہیں۔ وہ بڑے میچ میں پرفارم کرتے ہیں تو ٹیم جیتتی ہے۔
