بھارتی ریاست اتر پردیش کے وزیر اعلیٰ ادیتہ ناتھ کا پاکستان سے سندھ واپس لینے کی دھمکی دیتے ہوئے کہا تھا کہ اگر شری رام کی جنم بھومی پانچ سو برس بعد واپس لی جا سکتی ہے تو کوئی وجہ نہیں کہ انڈیا ’سندھو‘ (پاکستان کا صوبہ سندھ) کو واپس نہ لے سکے۔
بین الاقوامی خبر رساں ادارے کی رپورٹ کے مطابق یوگی ادیتہ ناتھ نے قومی سندھی کنونشن سے خطاب کرتے ہوئے کہا کہ ’ایودھیا میں پانچ سو برس بعد شری رام کا ایک بڑا مندر بنایا جا رہا ہے۔ جنوری میں وزیراعظم رام للا کو دوبارہ اپنے مندر میں بٹھائیں گے۔‘
اُن کا کہنا تھا کہ ’اگر رام کی جنم بھومی پانچ سو برس بعد واپس لی جا سکتی ہے تو کوئی وجہ نہیں کہ ہم سندھ کو واپس نہ لے سکیں، یوپی کے وزیراعلٰی کے اس خطاب کے بعد آڈیٹوریم میں بھرپور تالیاں بجائی گئیں۔
کنونشن سے خطاب میں انہوں نے مزید کہا کہ تقسیم ہند ہوئی تو لاکھوں افراد کا قتل عام کیا گیا، انڈیا کا ایک بڑا حصہ پاکستان کے نام سے وجود میں آ گیا۔
یو پی کے وزیر اعلیٰ نے کہا کہ سندھی کمیونٹی نے سب سے زیادہ نقصان اٹھایا کیونکہ ان کو اپنی سرزمین سے ہاتھ دھونا پڑ گئے، انہوں نے کہا کہ آج بھی ہمیں تقسیم ہند کے سانحے کا خمیازہ دہشت گردی کی صورت میں بھگتنا پڑ رہا ہے۔
یوگی ادیتہ ناتھ کا کہنا تھا کہ سندھی برادری کو اپنی موجودہ نسل کو اپنی تاریخ کے بارے میں آگاہ کرنا ہوگا، انہوں نے کہا کہ تقسیم ہند کے بعد اس کمیونٹی کو سب سے زیادہ نقصان اٹھانا پڑا۔
واضح رہے کہ اُتر پردیش کے انتہا پسند وزیراعلیٰ یوگی ادیتہ ناتھ کے مسلم دشمن اقدامات کسی سے ڈھکے چھپے نہیں ہیں۔
گزشتہ سال انہوں نے یو پی میں مساجد سے لاؤڈ اسپیکر ہٹانے کا حکم جاری کیا تھا، جس کے بعد یوپی کے مختلف شہروں سے پچیس ہزار سے زائد لاؤڈ اسپیکر اتار لئے گئے تھے، جبکہ پینتیس ہزار اسپیکر کی آواز کم کرادی گئی تھی۔
قابل ذکر بات یہ ہے کہ عدالت کی جانب سے حکم دیا گیا تھا کہ تمام مذہبی مقامات سے غیر قانونی لاؤڈ اسپیکر کو ہٹایا جائے، تاہم ایکشن صرف مساجد کیخلاف کیا گیا، جس کے باعث مسلمانوں میں شدید غم و غصے کی لہر دوڑ گئی تھی۔
