لندن: عالمی عدالت انصاف کے سابق وکیل جیفری نائس نے امریکا اور اسرائیل پر تنقید کرتے ہوئے کہا ہے کہ امریکا ہمیشہ اسرائیل کو عالمی عدالت انصاف سے بچاتا رہا۔
تفصیلات کے مطابق سابق وکیل جیفری نائس نے ایک بیان میں کہا ہے کہ امریکا اور اسرائیل کا یہ دعویٰ کہ وہ عالمی قوانین کا احترام کرتے ہیں قابل قبول نہیں ہے، امریکا کبھی بھی اسرائیل کو عالمی عدالت انصاف میں پیش نہیں کرتا۔
انھوں نے کہا فلسطین میں اسرائیلی کارروائی عالمی عدالت انصاف میں آنی چاہیے، لیکن امریکا ہمیشہ اسرائیل کو ظلم کے باوجود عالمی عدالت انصاف سے بچاتا ہے، اسرائیل اقوام متحدہ کی قراردادوں پر عمل نہیں کرتا اور امریکا بھی خاموش ہے اور ڈھٹائی سے دونوں ممالک عالمی قوانین کا احترام کرنے کا دعویٰ بھی کرتے ہیں۔
جیفری نائس کا کہنا تھا کہ اب بھی یو این سلامتی کونسل نے عالمی عدالت سے رابطہ کیا تو امریکا اسرائیل کو بچا لے گا، حماس کا حملہ غلط تھا لیکن اسرائیل کی بمباری بھی درست نہیں، اسرائیل کی غزہ میں سویلینز پر بمباری عالمی قوانین کی خلاف ورزی ہے، اسرائیل کا غزہ کا مکمل محاصرہ، خوراک اور پانی کی بندش تو جنگی جرم کا ارتکاب ہے۔
