ورلڈ کپ میں پاکستان کی بدترین کارکردگی کے بعد جنوبی افریقہ سے تعلق رکھنے والے قومی ٹیم کے بولنگ کوچ مورنی مورکل نے پی سی بی سے راہیں جدا کر لیں۔
اے آر وائی نیوز کے مطابق ورلڈ کپ میں پاکستان کا سفر ناکامی کے ساتھ ختم ہوتے ہی قومی ٹیم کے بولنگ کوچ مورنی مورکل نے پی سی بی کے ساتھ اپنا سفر ختم کر دیا۔
مورنی مورکل نے پاکستان کرکٹ بورڈ کواپنے فیصلے سے آگاہ کر دیا ہے اور وہ قومی ٹیم کی ذمے داریوں سے علیحدہ ہو کر اپنے ملک جنوبی افریقہ ٹی ٹوئنٹی لیگ میں مصروف ہو گئے ہیں۔
جنوبی افریقہ کے سابق فاسٹ بولر مورنی مورکل کا پی سی بی کے ساتھ رواں سال جون میں 6 ماہ کا کوچنگ معاہدہ ہوا تھا۔
ذرائع کا کہنا ہے کہ پاکستان ٹیم کے بولنگ کوچ کے لیے سابق پاکستانی پیسر عمر گل مضبوط امیدوار ہیں۔
واضح رہے کہ مورنی مورکل کی کوچنگ کے دوران پاکستانی بولرز کی کارکردگی عروج سے زوال کی جانب گامزن ہوئی اور گزشتہ دو ماہ کے دوران ایشیا کپ کے بعد کرکٹ کے سب سے بڑے عالمی میلے ورلڈ کپ میں بھی پاکستانی بولنگ اٹیک کا پول کھل گیا۔
دنیا کا سب سے مضبوط قرار دیے جانے والے بولنگ اٹیک کے سامنے نیوزی لینڈ نے 401 رنز اسکور کیے جب کہ بھارت، آسٹریلیا، انگلینڈ سمیت کئی ٹیموں نے متعدد بار 300 سے زائد رنز اسکور کیا جب کہ دو بار تو پاکستان کی جانب سے بنائے گئے 300 سے زائد رنز کا دفاع کرنے میں پاکستانی بولرز ناکام رہے۔
