اس گہما گہمی کے دور میں ہر دوسرا شخص موٹاپے اور ذیابیطس میں مبتلا ہورہا ہے، اس کی ایک بڑی وجہ یہ بھی لوگوں کو اپنی خوراک کے حوالے سے اتنا شعور نہیں کہ انہیں کونسی غذائیں استعمال کرنی چاہئیں اور کونسی نہیں؟
بین الاقوامی خبر رساں ادارے کی رپورٹ کے مطابق شمالی آئرلینڈ میں ہونے والی ایک طبی تحقیق میں یہ بات سامنے آئی ہے کہ تازہ پھلوں اور سبزیوں پر مشتمل غذا کو ترجیح دیکر آپ ذیابیطس ٹائپ 2 اور موٹاپے سے خود کو محفوظ رکھ سکتے ہیں۔
کوئنز یونیورسٹی بیلفاسٹ کی تحقیق کے مطابق پھلوں، سبزیوں اور سالم اناج کا زیادہ استعمال موٹاپے اور ذیابیطس ٹائپ 2 جیسے امراض کا خطرہ نمایاں حدتک ختم کر دیتا ہے۔
ایک لاکھ 13 ہزار سے زائد افراد کو اس تحقیق میں شامل کیا گیا تھا۔ ان افراد کی غذائی عادات اور صحت کا جائزہ 12 سال تک لیا گیا جس دوران 2600 میں ذیابیطس ٹائپ 2 کی تشخیص ہوئی۔
تحقیق سے یہ بات سامنے آئی کہ تازہ پھلوں، سبزیوں اور سالم اناج پر مشتمل غذا کا استعمال جسمانی چربی میں کمی لاتا ہے جس سے ذیابیطس ٹائپ 2 سے تحفظ ملتا ہے۔
اس کے ساتھ ساتھ ورم میں کمی آتی ہے جبکہ گردوں اور جگر کے افعال بھی بہتر ہوتے ہیں، یہ غذا بلڈ شوگر کی سطح کو معمول پر رکھتی ہے۔
محققین کا کہنا ہے کہ اس تحقیق میں صحت کے لیے مفید نباتاتی غذا کی شناخت کی گئی اور نتائج سے عندیہ ملتا ہے کہ ایسی نباتاتی غذائیں نقصان دہ ہوتی ہیں جن کو پراسیس کیا جاتا ہے۔
انہوں نے مزید بتایا کہ پہلی بار یہ ثابت ہوا ہے کہ نباتاتی غذاؤں سے میٹابولزم کے ساتھ ساتھ جگر اور گردوں کے افعال بہتر ہوتے ہیں جس سے ذیابیطس ٹائپ 2 سے متاثر ہونے کا خطرہ کم ہوتا ہے۔
محققین نے بتایا کہ موٹاپا ذیابیطس کا شکار بنانے والا سب سے بڑا عنصر ہے اور ناقص غذائی عادات سے موٹاپے اور ذیابیطس سے متاثر ہونے کا خطرہ 37 فیصد تک بڑھ جاتا ہے۔
سائیکل چلائیں، بیماریاں دور بھگائیں
محققین کے مطابق سالم اناج، تازہ پھلوں اور سبزیوں کے استعمال کے ساتھ ساتھ چینی اور پراسیس غذاؤں کے محدود استعمال سے ذیابیطس سے متاثر ہونے کا خطرہ 24 فیصد تک کم ہو جاتا ہے۔
