پاکستانی شوبز انڈسٹری کی معروف اداکارہ اشنا شاہ نے عالمی شہرت یافتہ بھارتی اسٹار پرینکا چوپڑا سے اپنا موازنہ کیے جانے پر حیرانی کا اظہار کر دیا۔
حالیہ انٹرویو میں اشنا شاہ نے کہا کہ لوگوں کو لگتا ہے میں پرینکا چوپڑا کے گفتگو کرنے کا انداز نقل کرتی ہوں اور اس پر مجھے شدید تنقید کا نشانہ بھی بنایا جاتا ہے۔
اشنا شاہ نے کہا کہ اس کے برعکس میرا لہجہ کینیڈین ہے لیکن پاکستان میں اسے بہت کم رکھتی ہوں، جب بیرون ملک جاتی ہوں تو میرا لہجہ ایک کینیڈین شہری جیسا ہوتا ہے۔
متعلقہ: لوگوں کو لگا مجھے شادی کا جوڑا مودی نے بھیجا ہے، اشنا شاہ
اداکارہ نے بتایا کہ میری پیدائش کینیڈا کی ہے اور میں نے وہاں زیادہ وقت گزارا ہے، جب میں غصے میں ہوتی ہوں تو لہجہ کینیڈین ہو جاتا ہے۔
اشنا شاہ نے رواں سال فروری میں گالفر حمزہ امین کے ساتھ شادی کی۔ حال ہی میں اداکارہ نے ایک پوڈ کاسٹ کے دوران خاوند سے متعلق حیران کُن انکشافات کیے۔
پوڈ کاسٹ میں انہوں نے بتایا تھا کہ جب ان کی شادی ہوئی تو ان کے شوہر کے موبائل فون کا کوئی پاس ورڈ نہیں تھا، انہوں نے شوہر کو پاس ورڈ لگانے کا کہا۔
ان کا کہنا تھا کہ ان کے شوہر کے مقبول ہونے کے باعث خواتین کو ان سے دور رہنا چاہیے تھا لیکن حیران کن طور پر عورتیں مزید ’بے غیرت‘ ہوگئیں اور ان کے شوہر کے پیچھے ہی پڑ گئیں۔
