اگر آپ کے پاس ٹیکنالوجی سے متعلق کوئی ایسا بزنس آئیڈیا ہے جو کینیڈا کی مارکیٹ کے لیے فائدہ مند ثابت ہوسکتا ہے تو پھر اسٹارٹ اپ ویزا کے لیے درخواست جمع کروائیں، کینیڈا آپ کو خوش آمدید کہے گا۔
کینیڈین اسٹارٹ اپ ویزا پروگرام کیا ہے؟
بھارت اور پاکستان سے ہر سال ہزاروں لوگ روزگار کے بہتر مواقع اور روشن مستقبل کے لیے امریکہ، کینیڈا اور یورپی ممالک کا رُخ کرتے ہیں۔
اس لیے ان ممالک میں امیگریشن اور ورک ویزا کے قوانین میں کسی بھی تبدیلی یا کسی نئے پروگرام کے تعارف پر گہری نظر رکھی جاتی ہے۔
جیسے کینیڈا نے رواں ماہ ورک پرمٹ کے قانون میں تبدیلی کی ہے جس کے بعد سے کینیڈا کے اعلان کردہ اسٹارٹ اپ ویزا پروگرام کو بعض ماہرین ایک ’سنہری موقع‘ قرار دے رہے ہیں۔
برطانوی نشریاتی ادارے بی بی سی کے مطابق یہ پروگرام بنیادی طور پر ان باصلاحیت غیرملکیوں کے لیے ہے جو کینیڈا میں اپنا چھوٹا کاروبار یا اسٹارٹ اپ قائم کرنا چاہتے ہیں۔
اسٹارٹ اپ ویزا عام ورک پرمٹ ویزا سے کافی مختلف ہے، اس کا مقصد صرف کاروباری افراد اور انٹرپرینیورز کو کینیڈا کی طرف مائل کرنا ہے۔
اسٹارٹ اپ کا معیار جانچنے کے لیے کچھ معیار طے کیے گئے ہیں اور وہ یہ ہیں کہ اس اسٹارٹ اپ میں اختراعیت (انوویشن) ہو، یہ مقامی لوگوں کے لیے نئی نوکریاں پیدا کرے اور عالمی سطح پر مقابلہ کر سکے۔
کینیڈین اسٹارٹ اپ ویزا کے لیے بنیادی شرطیں
کینیڈین اسٹارٹ اپ ویزا کی درخواست دینے کے لیے امیدوار کے پاس ایک ویلڈ بزنس یعنی کاروبار ہونا چاہیے۔ یہ ضروری ہے کہ امیدوار اس کاروبار کے شیئرز کی ملکیت رکھتا ہو۔ اس کے پاس کمپنی کے 10 فیصد یا اس سے زیادہ شیئرز ہوں اور اس کے پاس (شیئر ہولڈرز میٹنگ میں) ووٹنگ کا اختیار ہو۔
اس پروگرام میں زیادہ سے زیادہ پانچ افراد اپلائی کر سکتے ہیں۔
یہ ضروری ہے کہ اس اسٹارٹ اپ کو کسی کینیڈین تنظیم یا ڈیزگنیٹڈ بوڈی کی حمایت ملے اور لیٹر آف سپورٹ جاری کیا جائے۔
یہ لازم ہے کہ آپ کا کاروبار کینیڈا سے چلایا جائے، اس کی اہم سرگرمیاں کینیڈا سے ہوں اور اسے کینیڈا میں ہی قائم کیا جائے۔
انگلش زبان پر گرفت کے علاوہ اگر آپ کو فرانسیسی زبان بھی آتی ہو تو اس سے آپ کا اسٹارٹ اپ کینیڈا میں کامیاب ہوسکتا ہے۔ کینیڈین ویزا قوانین کے مطابق آپ کو انگلش یا فرانسیسی زبانوں میں سے ایک پر بولنے، لکھنے اور سمجھنے میں عبور ہونا ضروری ہے۔
اسٹارٹ اپ ویزے کے امیدوار کے لیئ یہ ضروری ہے کہ وہ اپنے اور اپنے سے جڑے رشتوں کے مالی اخراجات برداشت کرنے کے وسائل ظاہر کرے۔
سب سے اہم تقاضہ یہ ہے کہ امیدوار کا کاروبار جدت رکھتا ہو جس سے کینیڈا میں نئی نوکریاں پیدا ہوسکیں۔ یہ ویزا عام کاروباری افراد کے لیے نہیں۔ کینیڈا کو ایسے اسٹارٹ اپ پلان درکار ہیں جو پوری دنیا کو ٹکر دے سکیں۔
