ہریانہ: بھارتی شہر گروگرام میں بدھ کو جنگل سے نکل کر آنے والا تیندوا ایک گھر میں داخل ہو گیا، جس نے علاقے میں دہشت پھیلا دی، تیندوے کے حملے میں ایک 16 سالہ لڑکا زخمی بھی ہو گیا ہے۔
انٹرنیٹ پر ایک ویڈیو وائرل ہوئی ہے جو دراصل ایک سی سی ٹی وی فوٹیج ہے جس میں تیندوے کو ایک گھر میں داخل ہوتے دیکھا جا سکتا ہے، اس واقعے نہ صرف گھر والوں میں بلکہ پورے محلے میں سنسنی پھیلا دی تھی۔
علاقہ مکینوں نے واقعے کے بعد فوری طور پر پولیس اور وائلڈ لائف کو مطلع کر دیا، جس پر تیندوے کو پکڑنے کے لیے ایک ٹیم بھیجی گئی۔ فوٹیج میں دیکھا جا سکتا ہے کہ محکمہ جنگلی حیات کے اہل کار تیندوے کو پکڑنے کے لیے جال اور بے ہوشی کی ڈارٹ بھی لے کر آئے ہیں اور وہ تیاری میں مگن ہیں۔
#Haryana: Leopard enters house in Narshinghpur village in Gurugram#cliQIndia #Leopard pic.twitter.com/9tDiO8AjSX
— cliQ India (@cliQIndiaMedia) January 3, 2024
بڑی تعداد میں علاقے کے لوگ مذکورہ گھر کے سامنے جمع ہو گئے تھے، اہلکاروں نے 5 گھنٹوں کی جدوجہد کے بعد تیندوے کو ریسکیو کیا، اور اسے جنگل میں لے گئے۔
Watch: Leopard Enters House In Gurugram's Narsinghpur Village.#TNShorts #ViralVideo pic.twitter.com/e0HOVkrGDK
— TIMES NOW (@TimesNow) January 3, 2024
وائلڈ لائف انسپکٹر راجیش چاہل کے مطابق انھیں چار سالہ نر تیندوے کی اطلاع اس وقت ملی جب اسے نرسنگھ پور میں صبح 8 بجے کے قریب گاؤں والوں نے دیکھا، انسپکٹر کے مطابق انھوں نے دیکھا کہ جانور دیواروں کو پھلانگ کر ایک زیر تعمیر مکان میں چلا گیا تھا، اور ادھر ادھر گھومتا رہا پھر دوسرے گھر چلا گیا۔
تیندوے کو دوپہر کے قریب ڈیڑھ بجے ایک ٹرانکولائزر ڈارٹ مار کر پکڑا گیا، جب کہ زخمی لڑکے کو طبی امداد کے لیے اسپتال پہنچایا گیا۔
