اسلام آباد: افغانستان میں دہشت گردوں کی پناہ گاہوں اور ٹریننگ مراکز کی موجودگی کے شواہد سامنے آ گئے۔
تفصیلات کے مطابق افغانستان، کنڑ میں ٹی ٹی پی کے دہشت گردوں نے ایک مدرسے کی دستار بندی کی تقریب میں شرکت کی ہے، جس کی ویڈیو سامنے آئی ہے۔
یہ تقریب کنڑ میں موجود مدرسہ دار الحجرا والجہاد اور جامعہ منبہ الاسلام میں ہوئی، تقریب میں دہشت گرد عظمت لالا اور مولوی فقیر کی موجودگی بھی دیکھی جا سکتی ہے، اس تقریب میں متعدد افغان رہنماؤں نے بھی شرکت کی۔
ترجمان افغان طالبان کے مطابق افغانستان میں ٹی ٹی پی کے کوئی ٹھکانے موجود نہیں ہیں، جب کہ یہ تقریب افغانستان میں تحریک طالبان پاکستان کی موجودگی کا کھلا ثبوت ہے۔
ٹی ٹی پی افغانستان کی سرزمین پاکستان کے خلاف استعمال کرتی ہے، جس کا افغان حکومت کو بخوبی علم ہے، پاکستان نے مطالبہ کیا ہے کہ افغان عبوری حکومت دہشت گردوں کے خلاف بھرپور کارروائی کر کے خطے کو دہشت گردی سے پاک کرے۔
ذرائع کا کہنا ہے کہ ٹی ٹی پی کی افغان سر زمین سے پاکستان کے خلاف دہشت گرد کارروائیوں کی بنیادی وجہ افغان طالبان کا ٹی ٹی پی کو محفوظ پناہ گاہیں مہیا کرنا ہے۔
