اسلام آباد میں مدرسے سے دس سالہ بچے کی لاش ملنے کا واقعہ پیش آیا ہے، بچے کی گردن پر زخم کے نشان ہیں۔
تفصیلات کے مطابق اسلام آباد میں جی 6 تھری کے علاقے سے مدرسے سے طالبعلم کی لاش ملی ہے۔ لاش مدرسے کے واش روم میں تھی۔ ترجمان کیپیٹل پولیس کا کہنا ہے کہ بچے کی گردن پر زخم کی وجہ سے اس کی موت ہوئی۔
پولیس نے بتایا کہ بچے کے گلے پر تیز دھار آلے کا کٹ لگا ہوا تھا، بچے کو زخمی حالت میں اسپتال لے جایا گیا مگر وہ جانبر نہ ہوسکا اور دم توڑ گیا۔
بچے کا نام محمد عبداللہ ولد محمد ساجد بتایا گیا ہے، یہ بچہ مدرسے میں تعلیم حاصل کررہا تھا اور چھٹیوں کے بعد آج ہی واپس آیا تھا۔
بچے کا والد پی ایم کالونی میں رہائش پذیر ہے اور ٹیلیفون ایکسچینج میں سرکاری ملازم بھی ہے۔ تاحال بچے کی موت کی وجوہات سامنے نہیں آسکیں۔ لاش پوسٹ مارٹم کے لیے پولی کلینک اسپتال منتقل کی گئی ہے۔
پولیس کا یہ کہنا ہے کہ لاش ورثا کے حوالے کردی گئی ہے اور اس سلسلے میں تحقیقات کی جارہی ہیں کہ کس وجہ سے بچے کی موت واقع ہوئی۔
