استحکام پاکستان پارٹی کے مرکزی رہنما علیم خان نے پاکستان مسلم لیگ ن کے سربراہ اور سابق وزیراعظم نواز شریف کا شکریہ ادا کیا ہے۔
اے آر وائی نیوز کے مطابق استحکام پاکستان پارٹی (آئی پی پی) کے مرکزی رہنما علیم خان نے قومی اسمبلی کے لیے آئی پی پی امیدوار عون چوہدری کو این اے 128 لاہور سے ووٹ دینے پر نواز شریف کا شکریہ ادا کیا ہے۔
علیم خان نے اپنے ایک بیان میں کہا کہ اللہ تعالیٰ پاکستان پر رحم کرے اور دشمنوں کو نیست و نابود کرے، عام انتخابات کے انعقاد سے پاکستان آج نئی سمت طے کرے گا۔
استحکام پاکستان پارٹی کے رہنما کا کہنا تھا کہ معاشی و سیاسی مضبوطی کے لیے پاکستان کو مستحکم حکومت کی ضرورت ہے اور 8 فروری کے بعد ملک میں ترقی اور خوشحالی کا دور شروع ہوگا۔
نوٹ: الیکشن کی تمام رپورٹس، خبروں اور تجزیوں کیلیے لنک پر کلک کریں
واضح رہے کہ آئی پی پی سے انتخابی اتحاد کے باعث ن لیگ نے این اے 128 ماڈل ٹاؤن سے اپنا کوئی امیدوار کھڑا نہیں کیا تھا اور نواز شریف، شہباز شریف نے معاہدے کے مطابق آئی پی پی امیدوار عون چوہدری کو ووٹ دیا۔
الیکشن 2024: شریف برادران ’’شیر‘‘ پر مہر نہیں لگائیں گے!
نواز شریف جب آج ووٹ ڈالنے پولنگ اسٹیشن پہنچے تو ان کے ہمراہ مریم نواز کے علاوہ آئی پی پی امیدوار عون چوہدری بھی موجود تھے جو مہر کیسے اور کہاں لگانی ہے، اس سے متعلق سابق وزیراعظم کو گائیڈ کرتے رہے اور نواز شریف نے عون چوہدرے کے کہنے کے مطابق ہی بیلٹ پیپر پر مہر لگائی۔
