بھارتی بحریہ کا ایک حاضر سروس اہلکار 8 روز سے لاپتا ہے، لاپتا بھارتی سیلر کے والدین نے سی بی آئی انکوائری کا مطالبہ کر دیا ہے۔
بھارتی بحریہ میں شامل سیلر ساحل ورما 27 فروری کو بحریہ کے ایک جہاز سے دوران ڈیوٹی لاپتا ہو گیا تھا، جس کا تاحال کوئی سراغ نہ مل سکا ہے، بھارتی سیلر کے والدین نے اس معاملے کی سی بی آئی (CBI) انکوائری کا مطالبہ کیا ہے۔
لاپتا بھارتی سیلر کے والدین کو شبہ ہے کہ ان کے بیٹے کو جان بوجھ کر غائب کیا گیا ہے کیوں کہ جہاز میں 400 افراد سوار تھے، لیکن جموں سے تعلق رکھنے والا صرف ان کا بیٹا تھا جو لاپتا ہو گیا ہے، یہ معاملہ اس لیے بھی مشکوک ہے کہ ایک سپاہی بحریہ کے جہاز سے بغیر کسی سراغ کے کیسے غائب ہو گیا، اس کے علاوہ سی سی ٹی وی کیمروں میں شواہد کی عدم موجودگی پر بھی سوالیہ نشان لگ چکا ہے۔
ساحل ورما کے والد نے اپنے بیٹے کے لاپتا ہونے کے واقعے پر سوال اٹھاتے ہوئے جہاز کے ایک دن کے لیے اڈے پر واپس آنے اور پھر دوبارہ روانہ ہونے پر تشویش کا اظہار بھی کیا، ساحل ورما کے خاندان کا دعویٰ ہے کہ’ واقعے کی اطلاع دینے میں بھی بھارتی حکام نے جان بوجھ کر تاخیر کی اور واقعے کے دو دن بعد ایک بورڈ آف انکوائری شروع کی گئی۔
نیوی سیلر کے والدین نے بیٹے کی تلاش کے لیے سرچ آپریشن نہ ہونے پر عدم اطمینان کا اظہار کیا، اس واقعے نے بھارتی نیوی کے نام نہاد پیشہ ورانہ دعووٴں کا پول کھول دیا ہے، بھارت کے اپنے حاضر سروس اہلکار کا دوران ڈیوٹی غائب ہو جانا بھارتی اداروں کی ناکامی کا منہ بولتا ثبوت ہے۔
