تہران: ایران میں پٹاخوں میں ہولناک دھماکے سے ایک عمارت کو آگ لگئی، دھماکے سے ایک شخص ہلاک اور 11 زخمی ہو گئے۔
غیر ملکی میڈیا رپورٹس کے مطابق ایرانی دارالحکومت تہران میں اتوار کو پٹاخوں میں ہونے والے دھماکے سے ایک شخص ہلاک اور 2 فائر فائٹرز سمیت گیارہ افراد زخمی ہو گئے۔
ایرانی نیوز ایجنسی آئی ایس این اے کے مطابق یہ واقعہ تہران کے گرینڈ بازار کے قریب پیش آیا، دھماکے اور آگ سے ایک پرانی دو منزلہ رہائشی عمارت کو جزوی نقصان پہنچا جب کہ ایک اور عمارت بھی معمولی متاثر ہوئی۔
محکمہ فائر بریگیڈ کے ترجمان جلال مالکی نے میڈیا کو بتایا کہ یہ واقعہ بڑی تعداد میں گھریلو ساختہ پٹاخوں کے پھٹنے کے باعث پیش آیا، فائر فائٹرز نے اطلاع ملتے ہی جائے وقوعہ پر پہنچ کر آگ پر قابو پایا۔
تہران کی میڈیکل ایمرجنسی آرگنائزیشن کے مطابق زخمیوں میں سے دو کی حالت تشویش ناک ہے۔
واضح رہے کہ ایران میں نوروز سے قبل آخری بدھ کو روایتی آتش بازی فیسٹیول منایا جاتا ہے، جو اس سال 20 مارچ کو منایا جائے گا۔ فیسٹیول سے قبل ایران میں آتش بازی سے جڑے حادثات معمول ہیں۔
