برطانوی وزیر خارجہ ڈیوڈ کیمرون کی آج رات اسرائیل آمد کا امکان ظاہر کیا جارہا ہے۔
اسرائیلی اخبار کے مطابق برطانوی وزیر خارجہ ڈیوڈ کیمرون، نیتن یاہو اور دیگر اسرائیلی حکام سے ملاقاتیں کریں گے۔
ڈیوڈ کیمرون رام اللّٰہ میں فلسطینی اتھارٹی کے حکام سے بھی ملاقاتیں کریں گے۔ اس کے علاوہ غزہ میں امداد بڑھانے، یرغمالیوں کی رہائی اور ایرانی حملے پر تبادلہ خیال کریں گے۔
دوسری جانب روس کے صدر پیوٹن نے ایرانی ہم منصب رئیسی کو کشیدگی میں اضافے پر تحمل سے کام لینے پر زور دیا ہے۔
پیوٹن نے یہ بات منگل کو ایرانی صدر ابراہیم رئیسی کے ساتھ فون پر گفتگو کرتے ہوئے کہی۔
رہنماؤں نے اس بات پر تبادلہ خیال کیا جسے کریملن نے یکم اپریل کو شام کے دارالحکومت دمشق میں ایرانی قونصل خانے پر اسرائیلی حملے کے بعد ”ایران کی طرف سے اٹھائے گئے انتقامی اقدامات“کا نام دیا۔
کریملن نے کہا کہ پیوٹن نے تمام فریقین پر زور دیا کہ وہ ایسی کارروائیوں سے گریز کریں جس سے ایک نیا تصادم شروع ہو جس کے مشرق وسطیٰ کے لیے تباہ کن نتائج ہوں گے۔
ایران نے دمشق میں اسرائیلی حملے کے جواب میں ہفتے کے روز دیر گئے اسرائیل پر سیکڑوں ڈرون اور میزائل داغے، جس میں دو جنرلوں سمیت پاسداران انقلاب اسلامی کے سات اہلکار جان سے گئے تھے۔
ٹرمپ نے بائیڈن کو قصور وار ٹھہرادیا۔۔؟
پیوٹن نے ایران کے حملے پر اپنے پہلے عوامی طور پر نشر کیے گئے تبصروں میں کہا کہ مشرق وسطیٰ میں موجودہ عدم استحکام کی بنیادی وجہ اسرائیل فلسطین تنازعہ ہے۔
