وزیرخزانہ محمد اورنگزیب نے کہا ہے کہ سودی نظام کے خاتمے کا مرحلہ وار سلسلہ جاری ہے، ملکی زرمبادلہ کے ذخائر مستحکم ہیں۔

وزیرخزانہ سینیٹر محمد اورنگزیب نے قومی اسمبلی کے اجلاس سے خطاب کرتے ہوئے کہا کہ بہت سے بینکوں کی برانچز اسلامک میں تبدیل ہوچکی ہیں۔ اسلامی شریعت کورٹ نے سود کے خاتمے سے متعلق ٹائم فریم دیا ہے۔

انھوں نے کہا کہ ملکی اسٹاک ایکسچینج بلند ترین سطح پر ہے۔ آئی ٹی میں ہمیں کسی کی مدد کی ضرورت نہیں، آئی ٹی ایکسپورٹ 2 ارب ڈالرز سے بڑھ چکی ہے، آئی ٹی شعبے کی برآمدات میں خاطر خواہ اضافہ ہوا۔

محمد اورنگزیب نے کہا کہ ہمیں اس وقت آئی ایم ایف پروگرام کی ضرورت ہے، ہمیں آنے والے وقت میں آئی ایم ایف پروگرام سے نکلنا ہوگا۔ دوست ممالک بھی پاکستان میں سرمایہ کاری کررہے ہیں۔

انھوں نے کہا کہ ملکی معیشت کی سمت درست ہے، ڈیری اور لائیو اسٹاک کے شعبے میں بہتری لانے کی ضرورت ہے۔

وزیرخزانہ اورنگزیب نے کہا کہ کرنٹ اکاؤنٹ خسارہ سرپلس ہوچکا ہے، ٹیکس ٹو جی ڈی پی 10 فیصد پر نہیں چل سکتا۔