جنیوا: عالمی ادارہ صحت نے خبردار کیا ہے کہ اسرائیل کی جانب سے رفح پر حملہ خون کی ہولی ثابت ہو سکتا ہے۔
الجزیرہ کے مطابق ڈبلیو ایچ او نے خبردار کیا ہے کہ صیہونی فوج کا رفح پر حملہ لاکھوں فلسطینیوں کی زندگیوں کو خطرے میں ڈال دے گی اور صحت کے نظام کے ساتھ ’’خون کی ہولی‘‘ میں بدل جائے گی۔
عالمی ادارہ صحت کے ڈائریکٹر جنرل ٹیڈروس اڈھانوم گیبریئس نے جمعہ کو X پلیٹ فارم پر لکھا ’’عالمی ادارہ صحت کو اس بات پر گہری تشویش ہے کہ غزہ کے شہر رفح میں بڑے پیمانے پر فوجی آپریشن خون کی ہولی کا باعث بن سکتا ہے اور پہلے سے تباہ شدہ صحت کے نظام کو مزید کمزور کر سکتا ہے۔‘‘
.@WHO is deeply concerned that a full-scale military operation in Rafah, #Gaza, could lead to a bloodbath, and further weaken an already broken health system https://t.co/96h19H0Ppm
— Tedros Adhanom Ghebreyesus (@DrTedros) May 3, 2024
عالمی ادارہ صحت نے فوری اور مستقل جنگ بندی، غزہ اور اس کے آس پاس فوری انسانی امداد کی ترسیل میں رکاوٹوں کو دور کرنے کا مطالبہ کیا۔
اقوام متحدہ کے دفتر برائے رابطہ برائے انسانی امور (OCHA) کے ترجمان جینس لایرکے نے بھی کہا ’’رفح پر حملہ، انسانی نقصانات کے علاوہ پوری غزہ کی پٹی میں انسانی امداد کی کارروائیوں کے لیے ایک سخت دھچکا ہو گا، کیوں کہ رفح کراسنگ انسانی ہمدردی کی کارروائیوں کے مرکز میں واقع ہے۔‘‘
دوسری طرف یورپی ممالک اور اقوام متحدہ نے نیتن یاہو سے کہا ہے کہ وہ شہر پر زمینی حملے کا خیال ترک کر دیں، رفح میں غزہ کے مختلف علاقوں سے بے دخل ہونے والے لاکھوں افراد نے پناہ لی ہوئی ہے۔