کراچی: شہر قائد میں جرائم پیشہ عناصر نے واردات کا نیا طریقہ ڈھونڈ لیا، لاکھوں روپے مالیت کا آن لائن سامان بک کروایا اور سوزوکی چھین لی۔
تفصیلات کے مطابق کراچی میں لٹیروں نے آن لائن سامان بک کروانے کے بعد ڈرائیور سے بھری سوزوکی چھین لی، واردات کی سی سی ٹی وی فوٹیج اے آر وائی نیوز نے حاصل کر لی۔
معلوم ہوا کہ چھینی گئی سوزوکی میں ایئرکنڈیشنڈ، گیزر اور واشنگ مشین بھی رکھی ہوئی تھی، لٹیروں نے ڈرائیور اور کلینر سے موبائل فون اور بٹوے بھی چھینے۔
متاثرہ ڈرائیور نے پولیس کو بتایا کہ ڈکیتی کی واردات نارتھ ناظم آباد بلاک آئی میں کی گئی، ایک خاتون نے دکان دار سے فون پر ڈیڑھ ٹن کا اے سی، ایک واشنگ مشین اور ایک گیزر بک کروایا، خاتون نے فون پر میگا سینڑ ڈسٹرکٹ سینٹرل کی لوکیشن بتائی تھی۔
ڈرائیور کے مطابق جب وہ مذکورہ پتے پر پہنچا تو خاتون نے کہا 5 منٹ میں آ رہی ہوں، تاہم خاتون کے ہمراہ کئی ڈاکو بھی موٹر سائیکلوں پر پہنچ گئے، اور انھیں زور دار تھپڑ مارے اور سڑک پر بٹھا دیا، اور ڈاکو سامان سے بھری گاڑی چھین کر فرار ہو گئے۔
ڈرائیور نے بتایا ’’ڈاکو میرا موبائل فون اور پرس بھی چھین کر لے گئے، جب واردات کے چند منٹ بعد سوزکی ٹریکر کمپنی سے بند کروائی تو ڈاکو سامان رکشے میں لوڈ کر کے لے جانے لگے، میرا بھائی آگے گیا تو ملزمان نے اسلحہ دکھایا اور رکشہ لے کر بھاگ گئے۔‘‘
ڈرائیور کے بیان کے مطابق ٹریکر والے جب نیپا پر پہنچے تو ڈاکو فرار ہو رہے تھے۔ شاہراہ نور جہاں تھانے کی پولیس نے واقعے سے متعلق درخواست وصول کر لی ہے۔
