کراچی کے علاقے کورنگی میں پولیس نے رنگے ہاتھوں پکڑے گئے ڈاکوؤں سے مبینہ طور پر ڈیل کرلی۔
اے آر وائی نیوز کے مطابق کراچی کے علاقے کورنگی میں پولیس نے ایک ڈاکو کو مبینہ رشوت کے عوض رہا کردیا جبکہ دوسرے ڈاکو کو گٹکا فروش بنا دیا۔
گشت پر مامور پولیس نے ڈاکوؤں کو دو روز قبل اسلحہ اور چھینے گئے موبائل فون سمیت پکڑا تھا۔
ذرائع کا بتانا ہے کہ ملزمان مقابلے کے بعد زخمی حالت میں رنگے ہاتھوں گرفتار ہوئے تھے جبکہ موٹرسائیکل سوار فیملی نے ملزمان کو موقع پر شناخت کیا تھا۔
کورنگی پولیس اہلکار دونوں ملزمان کو پکڑ کر تھانے لے گئے اور مبینہ طور پر ایس ایچ او کورنگی ودیگر نے ملزمان سے ڈیل کی۔
ذرائع کے مطابق ایک ملزم کو مبینہ رشوت کے عوض چھوڑ دیا گیا جبکہ دوسرے ملزم پر صرف گٹکے کی پڑیا برآمد ہونے کا مقدمہ درج کیا گیا۔
