کراچی پولیس کی شہر قائد کے علاقے گلشن اقبال تیرہ ڈی میں اور واردات سامنے آئی ہے جس کی سی سی ٹی وی فوٹیج بھی سامنے آگئی۔
تفصیلات کے مطابق پولیس موبائل میں آنے والے سادہ لباس اہلکاروں نے پان شاپ پر لوٹ مار کی اور فرار ہوگئے، پولیس نے دکاندار شاہ زیب مغل کی مدعیت میں مقدمہ درج کرلیا۔
متاثرہ دکاندار شاہ زیب مغل نے بتایا کہ 2 جون کو تین افراد سادہ لباس میں آئے اور کیش کاؤنٹر سے 7 ہزار روپے نکالے، گزشتہ رات دوبارہ اسی موبائل میں سادہ لباس میں تین افراد آئے۔
دکاندار نے بتایا کہ ایک شخص دکان کے اندر آیا اور مجھے باہر لیکر نکلا، دوسرےنے دکان سے 50 ہزار کی سگریٹ اور 15 ہزار روپے لوٹے، مجھے پولیس موبائل میں بٹھایا اور گلشن چورنگی پر لے گئے۔
دکاندار شاہ زیب مغل نے مزید بتایا کہ مجھے موبائل سے اتارا اور میری جیب سے دس ہزار روپے بھی نکال لئے، موبائل کے آگے نمبر پلیٹ تھی نہ پیچھے، ان کیخلاف کارروائی کی جائے۔
واقعے کی فوٹیج بھی سامنے آگئی ہے جس میں دیکھا جاسکتا ہے کہ تیرہ ڈی کے علاقے میں واقع پان شاپ پر سادہ لباس اہلکار پہنچے، دکاندار کے باہر نہ آنے پر ایک اہلکار زبردستی دکان میں گھس گیا، دکاندار سے فون چھین کر ساتھی کے حوالے کیا اور دکاندار کو پکڑ کر موبائل میں لے گیا، فوٹیج میں سادہ لباس ایک شخص کا چہرہ واضح ہے جب کہ دوسرے نے ماسک پہنا ہے۔۔
پولیس حکام کا کہنا ہے کہ لوٹ مار کرنے والے اہلکاروں کا تعلق کس ادارے سے ہے چیک کررہے ہیں، سی سی ٹی وی کیمروں کی مدد سے بھی شناخت کر رہے ہیں۔