وفاقی حکومت کو جہاں بجٹ منظوری کے حوالے سے پی پی اختلافات کے باعث مشکلات کا سامنا ہے وہیں قائد ن لیگ نے جاری بجٹ اجلاس سے متعلق اہم فیصلہ کیا ہے۔
وفاقی حکومت نے رواں ماہ 12 جون کو آئندہ مالی سال کے لیے بجٹ پیش کیا تھا جس کی منظوری کے لیے قومی اسمبلی کا بجٹ سیشن جاری ہے اور شہباز حکومت کو پی پی اختلافات کے باعث بجٹ منظوری سے متعلق خدشات اور مشکلات کا سامنا ہے ایسے میں حکمران جماعت ن لیگ کے قائد اور سابق وزیراعظم نواز شریف کی جانب سے بجٹ اجلاس سے متعلق اہم فیصلہ سامنے آیا ہے۔
اے آر وائی نیوز کے مطابق سابق وزیراعظم نواز شریف نے بجٹ اجلاس میں شریک نہ ہونے کا فیصلہ کیا ہے اور اس حوالے سے بجٹ سیشن سے چھٹی کی درخواست اسمبلی سیکریٹریٹ کو بھیجی ہے۔
نواز شریف کی رخصت کی درخواست اسمبلی سیکریٹریٹ کو موصول ہوگئی ہے اور مکمل بجٹ سیشن سے رخصت کی درخواست بھی منظور کر لی گئی ہے۔
واضح رہے کہ نواز شریف بجٹ پیش کرنے کے دن بھی قومی اسمبلی سے غیر حاضر تھے۔
دوسری جانب وزیراعظم شہباز شریف کے صاحبزادے اور سابق وزیر اعلیٰ پنجاب حمزہ شہباز بھی بجٹ سیشن میں شرکت نہیں کریں گے۔
قومی اسمبلی سیکریٹریٹ نے حمزہ شہباز کی مکمل بجٹ سیشن سے رخصت کی درخواست منظور کر لی ہے جس کے بعد وہ بجٹ بحث اور منظوری کے عمل میں شریک نہیں ہوں گے۔
حمزہ شہباز بھی بجٹ پیش کرنے والے دن قومی اسمبلی سے غیر حاضر تھے۔
