اسلام آباد: حکومت اور پیپلز پارٹی کے درمیان مذاکراتی ادوار کی اندرونی کہانی سامنے آ گئی ہے، ذرائع نے دعویٰ کیا ہے کہ پیپلز پارٹی کے تمام مطالبات تسلیم نہیں کیے گئے ہیں۔
ذرائع کے مطابق پی پی پنجاب کے بلدیاتی الیکشن کے مطالبے سے پیچھے ہٹ گئی ہے، پنجاب میں بلدیاتی الیکشن رواں سال کرانے کا مطالبہ پورا نہیں ہوا، پنجاب حکومت رواں سال بلدیاتی الیکشن سے متعلق قانون سازی کرے گی، اور پی پی کو اس سلسلے میں اعتماد میں لے گی۔
ذرائع نے بتایا کہ مذاکرات کے دوران حکومت نے پنجاب میں پی پی مخالف انتقامی کارروائیوں سے اظہار لاعلمی کیا، ن لیگ کا کہنا تھا کہ حکومت اتحادی پارٹی سے سیاسی انتقام کیسے لے سکتی ہے۔
پی پی ذرائع کا کہنا ہے کہ حکومت نے پنجاب میں میرٹ پر بھرتیوں کی یقین دہانی کرائی ہے، مخصوص اضلاع میں پی پی کی تجویز پر تقرریاں کی جائیں گی، اور ضلعی انتظامیہ پی پی کی تجویز کردہ ہوگی۔
’حکومت نے پی پی کے تمام مطالبات تسلیم کر لیے‘
پنجاب میں پی پی کے مطالبات پر عمل درآمد کے لیے مانیٹرنگ کمیٹیاں بھی تشکیل دی گئیں، ن لیگ اور پی پی کی مانیٹرنگ کمیٹیوں کے اجلاس پندرہ روز بعد ہوں گے۔
