اسلام آباد: پیٹرولیم و گیس کی تلاش و پیداواری کمپنیوں نے پاکستان میں آئندہ تین سال میں 5 ارب ڈالر کی سرمایہ کاری کا اعلان کر دیا۔
وزیر اعظم شہباز شریف سے پیٹرولیم و گیس کے شعبے کی تلاش و پیداواری کمپنیوں کے وفد نے ملاقات کی۔ اجلاس کو بتایا گیا کہ وزیر اعظم کی شعبے کے مسائل کو سنجیدگی سے حل کرنے اور حکومت کی کاروبار دوست پالیسیوں کی وجہ سے پیٹرولیم و گیس کی تلاش و پیداواری کمپنیاں آئندہ تین برس میں پاکستان میں 5 ارب ڈالر کی سرمایہ کاری کریں گی۔
اس موقع پر وزیر اعظم شہباز شریف کا کہنا تھا کہ پاکستان میں مقامی سطح پر تیل و گیس کے ذخائر کی تلاش اولین ترجیح ہے، مقامی پیداوار سے عام آدمی کیلیے ایندھن اور گیس سستے ہوں گے۔
ملاقات کے دوران وفد نے شہباز شریف کو بتایا کہ تین سال میں دو سو چالیس مقامات پر کھدائی کی جائے گی۔
وزیر اعظم نے نائب وزیر اعظم اسحاق ڈار کی سربراہی میں ایک کمیٹی قائم کر دی جو ذخائر کی تلاش کیلیے تجاویز مرتب کرے گی۔
یو اے ای کی سرمایہ کاری
رواں سال مئی میں متحدہ عرب امارات (یو اے ای) کے صدر شیخ محمد بن زاید النہیان نے پاکستان میں 10 ارب ڈالر کی سرمایہ کاری کرنے کی یقین دہانی کروائی تھی۔
وزیر اعظم شہباز شریف اور صدر یو اے ای شیخ محمد بن زاید النہیان میں ملاقات ہوئی تھی۔ اس موقع پر نائب وزیر اعظم و وزیر خارجہ اسحاق ڈار، وزیر تجارت جام کمال خان، خواجہ آصف اور طارق فاطمی موجود تھے۔
صدر یو اے نے پاکستان میں 10 ارب ڈالر کی سرمایہ کاری کی یقین دہانی کروائی تھی۔ ملاقات میں دو طرفہ تعلقات بشمول سیاسی، اقتصادی اور دفاعی شعبوں میں تعاون پر گفتگو ہوئی تھی جبکہ آئی ٹی، قابل تجدید توانائی اور سیاحت میں تعاون کے فروغ کے عزم کا اعادہ کیا گیا تھا۔
اس سے چند روز قبل چینی کمپنی نے وزیر اعظم شہباز شریف سے ملاقات میں پاکستان میں سرمایہ کاری بڑھانے میں دلچسپی کا اظہار کیا تھا۔ وزیر اعظم سے چیئرمین وانگ جائیچنگ کی زیرِ قیادت ایم سی سی ٹونگسن ریسورسز کے وفد کی ملاقات ہوئی تھی۔
چینی کمپنی نے معدنیات و کان کنی کے شعبے میں سرمایہ کاری بڑھانے میں دلچسپی کا اظہار کیا تھا۔ چینی کمپنی نے شہباز شریف کو منرل پارک کے قیام اور مزید سرمایہ کاری کے منصوبوں پر بریفنگ دی تھی۔
شہباز شریف نے وفد کو بتایا تھا کہ حکومت بیرونی سرمایہ کاری کے فروغ کیلیے ترجیحی بنیادوں پر اقدامات اٹھا رہی ہے، چین پاکستان کا دیرینہ دوست اور ترقی میں اہم شراکت دار ہے، ہر مشکل وقت میں مدد کرنے پر پاکستانی قوم چینی قیادت و عوام کی مشکور ہیں۔
وزیر اعظم نے چینی کمپنی کو برآمدی اشیا کی تیاری کیلیے سرمایہ کاری کرنے کی دعوت دیتے ہوئے متعلقہ وفاقی وزرا اور افسران کو چینی کمپنی کے ساتھ مشاورت کی ہدایت کی تھی۔
