اسلام ٓآباد : ایس آئی ایف سی اور حکومت پاکستان نے مختلف شعبوں میں سرمایہ کاری کو راغب کرنے کے لئے متحدہ عرب امارات کی کنسلٹنٹ کمپنی سے معاہدہ کر لیا۔
تفصیلات کے مطابق ملکی معیشت میں بہتری لانے کی خاطر وزیراعظم پاکستان کے نظریے پر عمل درآمد شروع ہو گیا ہے، وزیر اعظم پاکستان کے نظریے کے مطابق براہ راست غیر ملکی سرمایہ کاری کو راغب کرنے کیلئے پیشہ ورانہ کنسلٹنسی فرم کے ساتھ معاہدہ طے پا گیا ہے۔
ایس آئی ایف سی کی سہولت کاری کے باعث وفاقی کابینہ کی طرف سے منظور شدہ کلیدی وزارتوں کیلئے متحدہ عرب امارات کی عالمی مینجمنٹ کنسلٹنگ فرم ”اے ٹی کیرنی مڈل ایسٹ لمیٹڈ“ کی خدمات حاصل کی جائیں گی۔
کیرنی ٹیم نے پبلک پرائیویٹ پارٹنرشپ اتھارٹی کے ساتھ مل کر ایس آئی ایف سی کے نیشنل کوآرڈینیٹر کے ساتھ ایک تفصیلی ملاقات کی، جس میں تعاون کے لیے روڈ میپ پر تبادلہ خیال کیاگیا۔
کیرنی ٹیم 18 ماہ کی مدت میں غیر ملکی سرمایہ کاری کو آگے بڑھانے کے لیے کئی اہم شعبوں پر توجہ مرکوزکرتے ہوئے مہارت فراہم کرے گی۔
اس معاہدے سے اہم شعبوں میں سرمایہ کاری کو راغب کرنے کی حکمت عملی اورمنتخب منصوبوں کے لیے پیشگی فزیبلٹی سٹڈیز کا انعقاد شامل ہے، اس اقدام کا مقصد ریگولیٹری عمل کو ہموارکرنا، قابل عمل سرمایہ کاری کی حکمت عملی تیار کرنا اور نجی سرمایہ کاری کو متحرک کرنے کے لیے فنڈز کا قیام شامل ہیں۔
یہ اسٹرٹیجک اقدام ایس آئی ایف سی اور حکومت پاکستان کے آئی ٹی، زراعت، فوڈ سکیورٹی، سیاحت، صحت، تعلیم، معدنیات اور سمندری شعبوں میں نجی سرمایہ کاری کو راغب کرنے کے عزم کو ظاہر کرتا ہے۔
اس اقدام سے عالمی سطح پر پاکستان کی سرمایہ کاری کی صلاحیت کو ظاہر کرنے اور ابھرتے ہوئے شعبوں میں غیر ملکی سرمایہ کاری کو راغب کرنے میں مدد ملے گی اور سرمایہ کاری کا ایک مضبوط اور پائیدار ماحولیاتی نظام تشکیل دے گا جس سے تمام سٹیک ہولڈرز کو فائدہ پہنچے گا۔