کراچی: شہر قائد میں پولیس کی رشوت ستانی اور لوٹ مار کے واقعات تھم نہیں سکے، راہ چلتے ایک شہری کی جیب میں 60 ہزار کی رقم دیکھ کر پولیس اہلکار وحشی بن گئے، اور شہری کا جبڑا توڑ ڈالا۔
تفصیلات کے مطابق کراچی میں پولیس اہلکاروں کی لوٹ مار کا ایک اور واقعہ پیش آیا ہے، رقم نہ دینے پر ایاز نامی ایک شہری کا جبڑا توڑ دیا گیا۔
اس واقعے میں مبینہ ٹاؤن پولیس اسٹیشن کے اہلکار ملوث تھے، جنھوں نے مبینہ طور ایاز پر تشدد کیا، ایاز کے بھائی نے اے آر وائی نیوز کو بتایا کہ پولیس اہلکاروں نے ایاز کو روک کر جامہ تلاشی لی تو اس کی جیب میں ساٹھ ہزار روپے ملے۔
بھائی نے رقم نہ دی تو اہلکار نے ٹی ٹی کا بٹ مار کر ایاز کا جبڑا توڑ دیا، صرف یہی نہیں جب اہل محلہ جمع ہوئے تو اہلکاروں نے ایاز کو ڈاکو ظاہر کر دیا۔
ایاز کے بھائی کے مطابق اہل محلہ ایاز کو جانتے تھے اس لیے انھوں نے کہا کہ ایاز کوئی ڈاکو نہیں بلکہ شریف شہری ہے۔ دوسری طرف ایاز کے اہل خانہ نے پولیس اہلکاروں کے خلاف سچل تھانے میں درخواست جمع کرا دی ہے۔
