کراچی: انسدادِ انسانی اسمگلنگ لاہور نے دو مختلف کارروائیوں میں کینیڈا اور ملائیشیا کا ورک ویزا دلوانے کے لیے 1 کروڑ 33 لاکھ سے زائد رقم بٹورنے والے ملزمان کو گرفتار کر لیا۔
تفصیلات کے مطابق وفاقی وزیر داخلہ محسن رضا نقوی کی ہدایات پر انسانی اسمگلنگ میں ملوث عناصر کے خلاف کریک ڈاؤن جاری ہے، انسدادِ انسانی اسمگلنگ لاہور نے ان کارروائیوں میں 2 انسانی اسمگلرز کو گرفتار کیا ہے۔
ایک ملزم کو لاہور اور دوسرے کو نارووال سے چھاپا مار کارروائی کے دوران گرفتار کیا گیا، ملزمان کی شناخت عمران علی اور رحمٰن علی کے نام سے ہوئی ہے، یہ ملزمان شہریوں کو غیر قانونی طور پر بیرون ملک بھجوانے میں ملوث پائے گئے۔
ملزمان نے شہریوں سے بیرون ملک ملازمت کا جھانسا دے کر کروڑوں روپے ہتھیائے، رحمان علی نے 2 مختلف کیسز میں شہریوں کو کینیڈا کا ورک ویزا دلوانے کے لیے 1 کروڑ 18 لاکھ روپے بٹورے، جب کہ عمران علی نے شہری کو ملائیشیا کا ورک ویزا فراہم کرنے کے لیے 15 لاکھ سے زائد کی رقم وصول کی۔
ترجمان ایف آئی اے کے مطابق گرفتار ملزمان شہریوں کو بیرون ملک بھجوانے میں ناکام رہے اور روپوش ہو گئے تھے، ملزمان مزید تفتیش کی جا رہی ہے۔
