کراچی : ڈیفنس فیز 5 میں سیاسی شخصیت کے بیٹے نے گارڈز کے ذریعے نوجوان کو بدترین تشدد کا نشانہ بنایا تاہم حارث جاکھرانی کےخلاف مقدمہ درج کرلیا گیا ہے۔
تفصیلات کے مطابق کراچی کے علاقے ڈیفنس میں سیاسی شخصیت کے بیٹے کا گارڈز کے ذریعے نوجوان پر تشدد کا واقعہ سامنے آیا۔
سیاسی شخصیت کے بااثر بیٹے حارث جاکھرانی کےخلاف مقدمہ درج کرلیا گیا ہے، ایف آئی آر میں جان سے مارنے کی کوشش، تشدد اور دیگر دفعات شامل کی گئیں ہے۔
سی ویو روڈ فیز 5 پر جم سے نکلنے والے نوجوان پر سیکیورٹی گارڈز نے تشددکیا ، ہتھیاروں مکوں لاتوں سےنوجوان کوبدترین تشددکا نشانہ بنایا گیا۔
نوجوان پر حملے کی فوٹیج بھی سامنے آگئی ہے، فوٹیج میں مدعی ابوبکر صدیقی کو جم سے نکل کرپیدل جاتے دیکھا جا سکتا ہے۔
فوٹیج میں دیکھا جا سکتا ہے بغیر نمبر پلیٹ کالی کار سے ایک ہتھیار بند سیکیورٹی گارڈ نکلا، رائفل تھامے گارڈ تیزی سے بھاگتا ہوا آیا اور نوجوان کو لات ماری۔
فوٹیج میں یہ بھی دیکھا جا سکتا ہے کہ نیلی کار سے مزیدافراد نکلے اور ابوبکر کو مارنا شروع کردیا۔
