بنگلادیش کی سابق وزیراعظم حسینہ واجد کے خلاف رنگپور میں طالبعلم کے قتل کا ایک اور مقدمہ درج کر لیا گیا۔
ڈھاکا ٹربیون کے مطابق بنگلا دیش انسٹی ٹیوٹ آف گلاس اینڈ سیرامکس کے طالب علم عبداللہ الطاہر کے قتل کے سلسلے میں سابق وزیراعظم شیخ حسینہ اور سابق وزیر روڈ ٹرانسپورٹ عبیدالقادر سمیت 40 افراد کے خلاف قتل کا مقدمہ درج کیا گیا ہے۔
رنگپور میں امتیازی سلوک کے خلاف طلباء کے احتجاج کے دوران گولی مار دی گئی۔ اس کے علاوہ 300 نامعلوم افراد کو ملزم نامزد کیا گیا ہے۔
مقدمہ اتوار کی دوپہر کو مقتول طاہر کے والد عبدالرحمن کی جانب سے عدالت میں دائر کیا گیا۔ مقتول طاہر رنگ پور شہر کا رہائشی تھا۔
19 جولائی کو امتیازی سلوک کے خلاف طلباء کے احتجاج کے دوران سٹی مارکیٹ کے سامنے عوامی لیگ کے کارکنوں کے ساتھ طلباء اور پولیس کے درمیان تصادم ہوا اس دوران فائرنگ سے طاہر جاں بحق ہوگیا۔
کیس کے پینل کے وکیل طارقزمان نے کہا کہ طاہر کو سابق وزیر اعظم شیخ حسینہ کے حکم پر گولی ماری گئی تھی، اسی لیے ہم نے عدالت سے درخواست کی تھی کہ ان کے اور عوامی لیگ کے جنرل سیکریٹری عبیدالقادر سمیت دیگر 39 افراد کے خلاف مقدمہ درج کیا جائے۔
