تھائی لینڈ کی بااثر شخصیت نے ایک سوال پر شدید غصے میں آکر خاتون رپورٹر پر تھپڑ برسادیئے، جس پر ان کے خلاف تحقیقات کا آغاز کردیا گیا ہے۔
بین الاقوامی رساں ادارے کی رپورٹ کے مطابق 79 سالہ رکن پارلیمنٹ اور سابق آرمی چیف پراویت وونگ سوون نے خاتون کو متعدد بار تھپڑ مارے، اس دوران وہ دیگر صحافیوں کے ہمراہ تھیں۔
اس معاملے پر رد عمل دیتے ہوئے تھائی سینیٹر تیواریت مانیچائی کا کہنا تھا کہ یہ حرکت جسمانی طور پر ہراساں کرنے کے زمرے میں آتی ہے۔یہ عمل ایک صحافی کی بھی بے عزتی ہے جو اپنے امور انجام دے رہی تھی، سینیٹر کا کہنا تھا کہ انہوں نے پراویت وونگ کے طرز عمل کی پارلیمانی تحقیقات کی درخواست کردی ہے۔
رپورٹس کے مطابق یہ واقعہ 16 اگست کو فیو تھائی پارٹی کے پیتونگٹرن شیناواترا کی وزیر اعظم بننے کے لیے پارلیمنٹ میں ووٹ حاصل کرنے کے چند لمحوں بعد پیش آیا تھا۔
خاتون ٹی وی صحافی نے مخالف کی جیت پر ان کے تاثرات معلوم کئے تھے، جس کا اظہار انہوں نے غالباً تھپڑ کی صورت میں دینا مناسب سمجھا۔
انہوں نے کہا کہ ’کیا پوچھ رہی ہو، رپورٹر کے سر کو تختہ مشق بنالیا اور متعدد بار تھپڑ رسید کئے، گو کہ وہ تھپڑ کوئی بہت زیادہ زوردار نہیں تھے لیکن بہرحال صحافی کی بے عزتی کرنے پر انہیں نتائج بھگتنا پڑ سکتے ہیں۔
تھائی لینڈ کی کم عمر وزیراعظم پیٹونگٹارن شیناوترا کون ہیں؟
اس واقعے کی تھائی لینڈ کی میڈیا کمیونٹی کی جانب سے بڑے پیمانے پر مذمت کی گئی۔ ملک کے پبلک براڈکاسٹر تھائی پی بی ایس نے پراویت سے کہا کہ وہ اپنے اعمال کی ذمہ داری لیں۔
