اسلام آباد : پی ٹی آئی رہنما اظہر مشوانی کے 2 گمشدہ بھائی گھر پہنچ گئے، دونوں کی بازیابی کیس اسلام آبادہائیکورٹ میں زیرسماعت ہیں۔
تفصیلات کے مطابق پی ٹی آئی رہنمااظہرمشوانی نے سماجی رابطے کی ویب سائٹ ایکس پر 2 گمشدہ بھائیوں کے گھر پہنچنے کی تصدیق کرتے ہوئے کہا کہ میرےدونوں بھائی رات 2بجےواپس آگئےہیں۔
انہوں نے تمام پاکستانیوں بالخصوص وکلاء، رپورٹرز، سوشل میڈیا ایکٹوسٹ اور انصافیوں کا ان کی محنت اور دعاؤں پر شکریہ ادا کیا۔
رہنما پی ٹی آئی کا کہنا تھا کہ دعا ہے کہ اللہ پاک تمام جبری گمشدہ افراد کو جلد از جلد ان کے اہل خانہ سے باحفاظت واپس ملائیں-
انہوں نے اسلام آباد ہائی کورٹ کے جسٹس میاں گل حسن اورنگزیب اور لاہور ہائی کورٹ کے جسٹس شہباز علی رضوی کا تہہ دل سے شکریہ ادا کیا، جنہوں نے کیس میں غیر ضروری تاخیر نہیں کی اور میرٹ پر قانون کے مطابق کارروائی کی۔
خیال رہے کہ جون 2024 میں رہنما پی ٹی آئی کے دو بھائیوں کو مبینہ طور پر اغوا کیا گیا تھا اور عدالت نے پی ٹی آئی کے فوکل پرسن کے بھائیوں کی بازیابی کا حکم دیا تھا۔
